The Definitive Guide to Living in the Capital , Cairo , Egypt

الجامعات المصرية فيها نماذج إيجابية جدًا من أعضاء هيئة التدريس، بيحترموا الطلاب وبيحاولوا يفيدوهم طول الوقت، دي حاجة ماحدش يقدر ينكرها أبدًا، لكن من ناحية تانية فيه نماذج سلبية، عندها مشاكل نفسية، ودي برضه حاجة ماحدش يقدر ينكرها.. وموجودة بالفعل في الجامعات، وطلاب كتير بيشتكوا من التعامل معاهم.

ومشاكل أعضاء هيئة التدريس في الجامعات مع الطلاب زادت مؤخرًا، وفيه منها اللي بيكون محل نزاع خارج الجامعة وعلى صفحات التواصل الاجتماعي، واللي بيكون على قد المساحة الضيقة للجامعة، وكمان فيه مشاكل بتوصل للقضاء، وده اللي خلى الدكتور عبد العظيم الجمال، أستاذ المناعة والميكروبيولجي بجامعة قناة السويس، يطالب بأن أي حد هيشتغل في هيئة التدريس بالجامعات لازم يتعمله اختبارات نفسية خاصة، علشان يتم التأكد أنه مؤهل للتعامل مع الطلاب.

وعبر الجمال عن رأيه من خلال حسابه الرسمي على موقع الفيسبوك، وأعلن إنه بيتمنى أن أي حد عاوز يشتغل في التدريس يتعمله اختبارات لضمان سلامة قواه العقلية والنفسية، واعتبر أن فيه قلة من أساتذة الجامعات خطر على الطلاب.

واتكلم الدكتور عبد العظيم الجمال كمان عن “الواسطة” في التعيين، وقال إنها سبب أزمة وجود مجموعة قليلة من المدرسين غير المؤهلين، ووصفهم بأنهم بيعانوا من قلة العلم، ومالهمش علاقة بالبحث العلمي والعملية التعليمية، وطالب بإن اللي يتعين في الجامعات لازم يكون متفوق علميًا وكمان متزن نفسيًا.

مطالبات الدكتور عبد العظيم الجمال لقت صدى كبير بين مؤيد ومعارض، وفتح باب نقاش كبير بين أطراف مختلفة، ويهمنا في كايرو 360 نعرف رأيكم في القضية دي، هل أنتم مع ولا ضد الاقتراح ده؟