The Definitive Guide to Living in the Capital , Cairo , Egypt

مصدر الصور الرئيسية: اليوم السابع.

رمضان زمان مختلف عن النهارده.. فوازير نيللي وشريهان وفطوطة الجميلة، ولمة العائلة في البيت أمام الشعراوي، وتعليق الزينة في الشوارع، وتفاصيل أكتر.. قررنا نسأل المصريين النهارده عن اللي مفتقدينه في رمضان بتاع زمان والإجابات كانت كلها مليانة حنين للماضي.

ناس كتير أجمعت أن لمة العائلة وتعليق الزينة في الشوارع ولعب الكرة قبل المغرب وبعد التراويح هي أكتر الحاجات اللي مفتقدينها، ونفسهم الأيام دي ترجع تاني ويبقوا وسط أهلهم اللي بعدوا عنهم.

أسماء عصام، 29 سنة، قالت إنها مفتقدة فوازير عمو فؤاد، وفطوطة، أما عادل ميلانو 29 سنة، فقال لنا إنه مفتقد حلقات مسلسل الأطفال “بكار”، ومحمود علي 29 سنة، قال لنا إنه بيتمنى الكاميرا الخفية بتاعة زمان ترجع تاني، وسالي رمضان، قالت إنها نفسها تشوف الفوازير وألف ليلة وليلة وعمو فؤاد وبوجي وطمطم والكاميرا الخفية وإديني عقلك وبدون مونتاج من تاني.

أما عبد الله طه 27 سنة، فقال لنا إنه حاسس إن رمضان الحالي مختلف بدرجة كبيرة عن رمضان زمان، وكمل إنه وحشه كل حاجة في رمضان زمان بداية من لمة العيلة على السحور، والصحيان بدري للمدرسة، وبعدها الرجوع بسرعة وفرحة للفرجة على التليفزيون وبرامج الأطفال وخاصة بكار، وبعد الإفطار الفرجة على المسلسلات.

وقالت مروة سامي إنها مفتقدة شاشة رمضان زمان، وخاصة قنوات ماسبيرو بمسلسلاتها والفوازير والإعلانات وتيترات البرامج، قبل ما الفضائيات تبقى كتير في مصر، وقالت مي حامد إنها مفتقدة فوازير نيللي، أما نيرة أمين فوحشها بكار والفوازير وألف ليلة وليلة واللعب بالفانون في الشارع.

أما عبد الرازق سمير فعنده قائمة كاملة للحاجات اللي مفتقدها وهي، فوازير رمضان، عمو فؤاد، بوجي و طمطم وعم شكشك، بكار، المغامرون الخمسة، الكاميرا الخفية، كلام من دهب، وقمر الدين، والراجل الي كان بيعمل كنافة بالطريقة القديمة، وزينة رمضان الي كانت بتتعمل من الورق والكتب القديمة، والفانوس الخشب، والتمر باللبن، ومسلسل القناة الأولي بعد صلاة التراويح، وصوت محمد رفعت في قرآن المغرب، وابتهالات النقشبندي قبل صلاة الفجر.

طاهر محمد 36 سنة، قال لنا إنه مفتقد طبق الحلويات اللي بيلف على الجيران كلهم رايح جاي طول الشهر، وأحمد عادل 29 سنة، وحشته الفرحه اللي كان بيحس بيها زمان لما يهل شهر رمضان، ومسلسل بكار وأغاني الشهر الجميلة، وأحمد أبو خليل قال لنا إنه مفتقد نزول الأطفال الشوارع بالفوانيس مع أغنية وحوي يا وحوي.

وأنتم مفتقدين إيه من رمضان بتاع زمان؟