The Definitive Guide to Living in the Capital , Cairo , Egypt

التصوير بقى جزء من حياتنا، وبقينا نوثق كل لحظة بتمر علينا بصورة أو فيديو علشان تبقى في ذاكرتنا حاجة جميلة نقدر نرجع لها في يوم من الأيام، وعلشان إحنا في كايرو 360 بنحب التفاصيل، هنقولكم النهاردة على كل اللي محتاجين تعرفوه عن Heaven 47 وده مكان تقدروا تعملوا فيه فوتوسيشن شخصي أو لزواج أو لعيد ميلاد، يعني ببساطة ده عبارة عن مكان تقدروا تتصوروا فيه وتطلع الصور مميزة.

المكان على نهر النيل مباشرة، وفيه أماكن مجهزة بديكورات مختلفة تقدروا تتصورا فيها سواء صور بالموبايل أو من خلال كاميرا بروفيشنال، ودخول الفرد الواحد 50 جنيه، والمكان كمان بيوفر أكل وشرب بحد أدنى 50 جنيه، وأسعار المشروبات هناك مختلفة، فمثلًا كوباية الشاي بـ25 جنيه شاملة الضريبة والخدمة.

ولو أنتم عرسان ومحتاجين تدخلوا تتصوروا في أجمل المناظر الطبيعية فده هيكلفكم 600 جنيه، شاملة دخول المصور ومعدات التصوير والعروسين، وأي فرد زيادة هيكون بـ50 جنيه، وتقدروا كمان لو حابين تعملوا عيد ميلاد عندهم بحد أدنى 50 جنيه للفرد ورسم دخول التورتة 50 جنيه وتقطيعها والخدمة الخاصة بيها لـ10 أفراد هتكلفكم 50 جنيه.

يمكن بناخد على المكان إن سعره مبالغ فيه شوية، ونتمنى يقللوا الأسعار علشان الكل يقدر يروح ويتصور هناك.

المكان مجهز ومصمم بأجمل أنواع الزرع، وتقدروا تروحوا في أي وقت وإحنا بنرشح لكم دايمًا اختاروا وقت ما قبل الغروب علشان تستمدوا من أشعة الشمس الجميلة منظر جمالي يفوق الخيال، والمكان فيه إضاءة هتساعدكم على التصوير لو بالليل، وكمان المكان دايمًا بيطور من نفسه علشان يوفر لرواده أجمل المناظر والأشكال اللي تساعدهم أنهم ينبسطوا ويعملوا فوتوسيشن العمر.

العنوان: داخل نادي القوات المسلحة – كورنيش المعادي.

رقم التليفون: 01022995555

صفحة الفيسبوك من هنا.