The Definitive Guide to Living in the Capital , Cairo , Egypt

بعد ارتفاع أسعار البنزين، ولإن العربية جزء مهم في حياتنا، وشئ أساسي وضروري ولا يمكن الاستغناء عنه، بدأ قطاع كبير مننا يدور على أنسب وسيلة يقدر يوفر فيها في بنزين عربيته لأبعد حد، علشان كده قدرنا في كايرو 360 نجيبلك 10 نصايح عملية هتساعدك توفر استهلاك البنزين، وتحافظ كمان على صحة عربيتك.

تعالوا نعرفها مع بعض:

1- مبدئيًا، لازم تتأكد قبل أي حاجة من سلامة دورة البنزين والميكانيكا بشكل عام في عربيتك، وحاول تخلي عينك دايمًا على مؤشر الحرارة في العربية، لأن ارتفاع حرارة الماتور دليل على وجود مشكلة، وإهمالها بيزيد من استهلاك البنزين بنسبة لا تقل عن 10%.

كمان الصيانات الدورية زي تغيير زيت الماتور، أو تزويد ماء الرايدياتير، أو التأكد من سلامة السيور ومولد الكهرباء وفلتر الهواء والبوجيهات مهمة جدًا، فعلى سبيل المثال الزيت المستخدم أو المحروق بيستهلك 3% بنزين أكثر، ده غير إن فلاتر الهواء والبوجيهات اللي فيها مشاكل بتستهلك 10% من الوقود أكثر، وممكن النسبة دي تتضاعف لـ 20 % أو 30 % في حالات الازدحام والسرعات البطيئة.

نقطة تانية مهمة وهي كاوتشات العربية، لازم يكون ضغط الهواء فيها مضبوط، لإن الكاوتشات الفاضية بتستهلك 70% بنزين أكثر، وكمان عدم ضبط زوايا الكاوتشات بيستهلك 10% بنزين أكتر.

2- كل 100 كيلوجرام زيادة في شنطة العربية أو في وزنها بشكل عام، بتنقص 0.5 كيلومتر من المسافة اللي بتقطعها العربية بكل لتر بنزين، يعني لو بتقطع مسافة كيلومتر واحد بلتر واحد بنزين، فكل 100 كيلوجرام هتحملها على العربية هتخلي المسافة اللي هتقطعها بلتر البنزين تبقى 0.5 كيلومتر بدل كيلومتر واحد، وده معناه حرق واستهلاك زيادة للبنزين.

كمان المشي في طرق رملية أو طينية؛ بيزود مقاومة العربية، وبالتالي بيزود استهلاك وحرق البنزين.

3 ـ لو هتسخن عربيتك الصبح، بلاش يبقى التسخين لفترة طويلة، وممكن تستبدل التسخين وانت واقف بإنك تتحرك بالعربية لمسافة كيلومتر واحد بسرعة بطيئة، بس حاول ماتطولش عن كيلومتر لإن السرعة المنخفضة بتزود استهلاك البنزين برده.

وخلي بالك، لو عربيتك مانيوال ماتزودش في الضغط على النقلة الواحدة في نقلات “الفتيس” أو بمعنى تاني “بلاش تحرق في النقلة” لإن سرعة 60 كيلومتر/ الساعة على الغيار 3 بترفع معدل استهلاك البنزين 25٪ عن لو كنت ماشي على نفس السرعة بس على غيار 5.

4ـ حاول دايمًا تاخد الطرق السريعة، وده لإنها أفضل في خفض استهلاك البنزين، وحاول على قد ما تقدر تتجنب الوقوف في الإشارات والزحمة، لكن برده السرعة الزيادة بتستهلك كميات أكبر من البنزين.

في نفس الوقت، بلاش السرعة المفاجئة أو الـ “Kick Down” لإن كل ما بتضغط على دواسة البنزين، كل ما بتضخ كمية أكبر من البنزين، لكن لو محتاج تزود سرعتك، ممكن تعمل ده ببطء ونعومة، واستخدم مثبت السرعة في الرحلات الطويلة وعلى الطرق المستوية.

5ـ المعلومة الجاية دي كلنا تقريبًا عارفينها، وهي إن تشغيل التكييف بيستهلك 20% إضافي من استهلاك البنزين الطبيعي لعربيتك جوه المدينة وبنسبة 3% على الطرق السريعة، علشان كده يفضل تفتح الشباك لو انت جوه المدينة، وتشغل التكييف على الطرق السريعة.

6ـ لما تيجي تمون عربيتك، مون والمؤشر بتاع البنزين بين النصف أوالثلث، وده علشان تحافظ على انتظام كمية البنزين الداخلة للماتور وما تنخفضش كفاءة عمله وبالتالي يستهلك كمية أكبر من البنزين.

وخلي بالك إن أنسب وقت للتموين لما تكون الأرض باردة، يعني الصبح بدري، وده لإن كثافة البنزين بتكون عالية، وبلاش تمون بالليل لأن الأرض بتبقى سخنة بالليل، واطلب من عامل البنزينة إنه يخلي سرعة مسدس التعبئة بطيئة، علشان يقلل الأبخرة اللي بتطلع، وبلاش تملى تانك البنزين لآخره.

7ـ اطفي العربية في حالة إنك منتظر أو واقف في زحمة، وده لإن إعادة تشغيل الماتور مش بتاخد كمية كبيرة من البنزين الإضافي، وبالتالي هتوفر في استهلاك البنزين بنسبة لا تقل عن 12%، وده لإن الماتور بيحرق كمية بنزين في كل دقيقة واحدة انتظار تكفي السواقة لمسافة نص ميل، ودي ميزة مهمة في العربيات الهجينة أو “الهايبرد” اللي بتمشي بالكهرباء والبنزين مع بعض، لإنها في حالة الوقوف بتوقف ضخ بنزين.

8ـ جمع مشاويرك كلها في وقت واحد، واستخدام نظام المشاركة بينك وبين أصحابك وزمايلك في الشغل اللي معاهم عربيات، وحاول تقوم بمشاويرك بعيد عن الزحمة.

9ـ السواقة عكس اتجاه الهواء ( لو رياح بسرعة 30 كم/ ساعة) بيزيد من استهلاك البنزين  6%، وكمان استخدام الطرق المرتفعة أو اللي فيها ميل لأعلى، بيزيد من استهلاك البنزين 7%.

10ـ لو هتشتري عربية جديدة، أولًا مبروك عليك، ثانيًا قارن بين معدل استهلاك البنزين للعربيات المختلفة، وحط دايمًا في الاعتبار إن كبر حجم العربية والماتور بيؤدي لتقليل كفاءة استخدام البنزين، وبالتالي مهم جدًا تستخدم أنواع كويسة من البنزين على الرغم من ارتفاع سعرها، وده لإنها هتديلك معدل احتراق أعلى.