The Definitive Guide to Living in the Capital , Cairo , Egypt

السينما في زمننا ده ماعادتش مساحة تسلية أو تقضية أوقات لطيفة والسلام، وإنما بقت مساحة تثقيف ومعرفة واسعة جدًا، علشان كده بدأنا نشوف مؤخرًا أكتر من مؤسسة معرفية أو ثقافية تنظم نادي للسينما متضمن لعروض مختارة بعناية لطرح ومناقشة أفكار بعينها، وتسليط الضوء على حاجات كتيرة ماكناش هناخد بالنا منها لولا المشاهدة الواعية بالكواليس والماورائيات.

أحد أهم المؤسسات اللي بتقوم بالنشاط ده هي مؤسسة التعبير الرقمي العربي “أضف”، وده بيتم من خلال جناحها الاجتماعي “دكّة أضف” بالمقطم، اللي بتنظم كل شهر سلسلة عروض بينها رابط ما، الرابط ده إما بيكون جغرافي بمعنى أن عروض أفلام الشهر كلها تكون بتنتمي لإنتاج سينما بلد معين أو نطاق جغرافي معين.. وإما بيكون رابط فكري أو موضوعي بمعنى أن العروض تكون بتدور في فلك فكرة معينة أو بتناقش موضوع معين.

مع بداية عام 2017 تم الإعلان عن عروض يناير في سينما دكة، اللي قررت تخليها رحلة إلى المستقبل، باختيارها مجموعة أفلام بتحاول تتخيل صورة العالم في العقود المقبلة، وقام بالاختيار الكاتب السينمائي محمد المصري، وكالعادة العروض هتبقى أسبوعية، ويوم الثلاثاء هيكون اليوم المخصص ليها.

العرض الأول هيكون يوم الثلاثاء 10 يناير، وهيكون بطله فيلم “Children of men”، الفيلم من إنتاج سنة 2006، وبيحكي عن حال البشر بعد فترة من الحروب والانقسامات أدت إلى انقطاع عملية الإنجاب لمدة 18 سنة، وده كان تهديد مباشر بفناء البشرية، بعدين هيظهر أحد النشطاء السياسيين القدامى وهيلاقي نفسه محطوط في مسؤولية حماية المرأة الوحيدة اللي حملت من ساعة بداية المشاكل، وهيحاول الناشط “فارون” حمايتها وتسليمها لجمعية علمية علشان تدرس الحالة وتحاول توجد حل علاجي لمشكلة البشرية من خلالها.
https://www.youtube.com/watch?v=2VT2apoX90o

العرض الثاني هيكون يوم الثلاثاء 17 يناير، وبطله فيلم “Looper” اللي بيطرح من جديد موضوع السفر عبر الزمن لكن في قصة غريبة هتواجه فيها الشخصية الرئيسية نفسها من المستقبل مع مهمة مدفوعة الأجر بالقتل!
https://www.youtube.com/watch?v=2iQuhsmtfHw

العرض الثالث هيكون يوم الثلاثاء 24 يناير، وبطله فيلم “Her” من إنتاج سنة 2013، الفيلم بيحكي قصة غريبة عن الوقوع في الحب مع أذكى نظام تشغيل توصلت ليه البشرية، والصراع النفسي الناشئ عن الوقوع في علاقة آلية لكنها مشابهة للتجربة البشرية في مساحة ما.
https://www.youtube.com/watch?v=WzV6mXIOVl4

وتختتم العروض يوم 31 يناير بفيلم “The Lobster” من إنتاج سنة 2015، واللي بيحكي قصة أخرى غريبة عن قوانين مدنية في المستقبل بتفرض على العزاب الإقامة لمدة محددة في أحد المباني كفرصة أخيرة لمحاولة الدخول في علاقة ناجحة مع شريك من الجنس الآخر، وفي حالة الفشل هيتحول العازب إلى حيوان باختياره ويتم إطلاقه في البرية.

https://www.youtube.com/watch?v=LTNZmOJxuAc

نختم كلامنا بالتنويه على أن عروض سينما دكة غالبًا بتتبعها نقاشات ثرية جدًا مع ضيوف أو بين الجمهور وبعضهم، وده بيخلي الموضوع تجربة فكرية ثرية جدًا مش مجرد فسحة وفرجة..
نتمنى لكم مشاهدة ممتعة، ومفيدة.