Mohamed Talaat
الفتة عند المصريين في عيد الأضحى من الطقوس الرسمية اللي مفيش غنا عنها، وفيه أكلات كتير بتتظلم بسبب حبنا للفتة، علشان كده إحنا في كايرو 360 قررنا نلفت نظرم لـ 6 أكلات جميلة تانية تقدر تستخدم فيها اللحمة من غير ما يبقى العيد كله فتة.
المشويات
وبتشمل الكباب والكفتة سواء ضاني أو عجالي، وحلاوتها في أنك بتتبلها وتشويها بنفسك.
الرقاق باللحمة
سواء كان رقاق بلدي أو سوري، فلما يتسقى بالشوربة ويتحشي لحمة مفرومة بيكون طعمه حكاية، وبتحتاج تغطس فيه.
الكبدة
بعيدًا عن أنها ممكن تتاكل نية، لكن من عادات كتير من المصريين انهم بيفطروا بيها الصبح بعد الذبح، وأحلى طريقة انها تقطعها قطع متوسطة وتتبل بالتوم والبصل المبشور والفلفل والبهارات، وتتشوح في شوية زيت لمدة 5 دقائق وبعدين تضاف لها مياه وتتساب على نار هادية تتسوى.
الحلويات
ودي بقى تشمل الفشة والكرشة والطحال واللسان ولحمة الراس وغيرهم، ودول لازم يتنضفوا ويتسلقوا كويس جدًا، بس محبوبين وسط كتير من المصريين.
الممبار
يعتبر من الأكلات المفضلة في عيد الأضحى، وبيتنضف كويس ويتحشي ويتسلق وبعدين يتحمر في الزيت.
الحواوشي
فيه أكتر من طريقة لعمله ودا بيختلف من مكان لمكان وهو أكلة شعبية تتبل بأي حاجة وتتسوى بأي طريقة مش هتفرق، أهم حاجة الطعم.
مقترح
الحياة في كايرو
تقرير.. مصر الثانية إفريقيًا من حيث عدد الأثرياء والقاهرة فيها 7200 مليونير
ترتيب مصر من حيث الأثرياء ثروات مصر +4
صحة ولياقة
