The Definitive Guide to Living in the Capital , Cairo , Egypt

في ظل الإجراءات الوقائية اللي كتير من دول العالم بدأت تنفذها للحد من انتشار فيروس كورونا المستجد، خدت مصر كمان كتير من الخطوات الجدية في الاتجاه ده، وكانت محافظة القاهرة واحدة من أهم وأنشط المحافظات اللي خدت ونفذت قرارات وإجراءات وقائية مهمة ومخصصة لحماية ووقاية المواطنين والمقيمين على أرضها.. وعلشان كده كان مهم نسلط الضوء على أهم 5 إجراءات تم تنفيذها بالفعل على مستوى القاهرة.. تعالوا نعرفها من هنا:

1- مبدئيًا.. حي الموسكي بدأ بغسل وتعقيم الشوارع الحيوية في القاهرة والي منها شارع الجيش والأزهر وميدان العتبة وشارع محمد علي والشوارع المؤدية للمسرح القومي ومدخل الجراج ورصيف حلاوة.. ده غير عملية التعقيم المستمرة للمستشفيات والمراكز الطبية وأماكن التجمعات العامة والأماكن السياحية، وتعقيم وسائل النقل العام.

2- كمان جامعة القاهرة نجحت في تنفيذ أول تجربة للتعليم عن بعد باستخدام آليات التواصل الإلكتروني، وده ضمن خطة الجامعة فى التحول للتعليم الإلكتروني والدراسة عن بعد، وتنفيذ خطة الجامعة لمواجهة فيروس كورونا المستجد، واللي بتشمل كمان عملية تعقيم وتطهير لكل المنشآت والمرافق التابعة للجامعة وإخلاء المدن الجامعية وتعقيمها كإجراء احترازي.

أما الطلبة اللي عندهم مشاكل خاصة بالإنترنت.. الجامعة هتوفر لهم اسطوانات CD عليها كل محاضرات الأسبوع ممكن يستلموها من الكليات فى نهاية الأسبوع.

الخطة دخلت حيز التنفيذ فعلًا من يوم 15 مارس وهتستمر لمدة 15 يومًا، هتكون الدراسة فيها من خلال النظم الإلكترونية بشكل كامل.

3- محافظة القاهرة شكلت غرفة عمليات شغاله على مدار 24 ساعة، مع رفع درجة الاستعداد في كل المديريات والهيئات والشركات والإحياء، وتخصيص أرقام للإبلاغ عن أى حالات يشتبه في إصابتها.

الأرقام: 23912136 – 01205734449 والخط الساخن 114.

4- تنفيذًا لقرار رئيس الوزراء.. تم إغلاق أكتر من 540 مركز تعليمي ومركز دروس خصوصية على مستوى القاهرة.. وكمان إغلاق 129 مركز رياضي “جيم” و87 حضانة أطفال.

5- اللواء “خالد عبدالعال” محافظ القاهرة أصدر قرار بمنع إقامة الأسواق الأسبوعية زي سوق الجمعة، وكمان حظر “الشيشة” في القهاوي والكافيتريات والأماكن العامة على مستوى القاهرة، للحد من انتشار الفيروس وللوقاية منه، مع فرض عقوبات على مخالفين القرار بتوصل لغلق المكان فورًا.