The Definitive Guide to Living in the Capital , Cairo , Egypt

الحياة في كايرو

في حديقة المريلاند.. انطلاق أول مهرجان للعسل في القاهرة

الميريلاند عسل نحل مهرجان عسل النحل مهرجانات القاهرة
في حديقة المريلاند.. انطلاق أول مهرجان للعسل في القاهرة
بواسطة
Mohamed Talaat

انطلقت النهاردة أول أيام مهرجان العسل في حديقة الميرلاند في مصر الجديدة، واللي بيتم تنظيمه لأول مرة في مصر، وهيستمر حتى 18 أكتوبر، وهيكون فيه تبادل خبرات لتطوير صناعة العسل، وكمان دورة في تنشيط السياحة، وألعاب للكبار والأطفال، وتوفير فرص عمل للشباب.

المهرجان هيجمع أكبر منتجين للعسل، للتأكيد على دور النحل في التوازن البيئي، والتعريف بأهمية العسل كمنتج غذائي، وكمان هيكون فيه سبل توفير فرص عمل للشباب من خلال منحهم قروض لإنشاء مناحل أو منافذ بيع، وكمان هيتعلموا على إيد متخصصين تربية النحل واستخراج العسل، والتسويق، لفتح أسواق جديدة، وهيكون من أهم الحضور في المهرجان سعد عبد الرحمن “شيخ النحالين” واللي سنه تخطى الـ100 عام وهيتم تكريمه خلال المهرجان بحضور منى محرز، نائب وزير الزراعة اللي حضرت افتتاح المهرجان.

ورغم أن المهرجان لأول مرة بيتنظم في مصر لكن فيه دول كتير في العالم بتحتفل بيه، من أشهرها مهرجان العسل الروسي، ومهرجان سلوفينيا، والسعودية، وهيشارك في المهرجان السنة دي 8 دول بخلاف مصر هما “السعودية واليمن والأردن والعراق وسلطنة عمان وليبيا وتونس ورواندا” ده غير الشركات اللي شغالة في المجال.

المهرجان الأول للعسل هيكون “ترفيهي – سياحي – اقتصادي – بيئي –صحي”، وهدفه رفع الوعي الإجتماعي بأهمية تناول عسل النحل الطبيعي، باعتباره محفز للمناعة الطبيعية، وداعم للصحة العامة للمصريين، وعندهم هدف أن المصريين يستهلكوا 2 كيلو عسل كل سنة بدل المعدل الحالي اللي اتقدر بـ100 جرام.

وعلشان تعرفوا تفاصيل أكتر تقدروا تزوروا المهرجان في حديقة الميرلاند – مصر الجديدة، أو تتصلوا على رقم التليفون 01032558867، أو تزوروا صفحتهم على الفيسبوك من هنا.

مقترح