The Definitive Guide to Living in the Capital , Cairo , Egypt

مافيش حد فينا ما بيفكرش يجيب هدية لمامته في عيد الأم، وكتير مننا بيحاول لحد آخر لحظه إنه يجيب هدية قيَمة ومميزة وعلى قد الإيد، لكن مش كتير مننا بينجح في ده للأسف، وده يمكن سببه مادي أكتر من أي حاجة تانية، لإن أكيد مش هنبخل على أمهاتنا في حاجه زي دي، لكن على رأي المثل “العين بصيرة والإيد قصيرة” خصوصًا إن عيد الأم دايمًا بيكون في 21 من الشهر، يعني المرتب بح.

النهارده، في كايرو 360 فكرنا نستعد معاكم لعيد الأم ونساعدكم في هدية تكون حلوة وتفيد، وفي نفس الوقت مش هتكلفكم فلوس، وقدرنا نجيب لكم 5 هدايا ممكن تقدموها لأمهاتكم في عيدهم:

ريحها في عيدها بإنك تعمل الوظايف الروتينية اليومية اللي ماما بتعملها دايمًا مكانها، زي التنظيف، والطبخ، غسيل المواعين، غسل الهدوم، ترويق البيت.

اتمشى معاها في أي مكان هي بتحبه، ولو قريب من الكورنيش أو البحر يبقى زي الفل، التمشية جميلة وهتخليها وتخليك تفضفضوا عن مشاعركم.

اعرف أكلتها المفضلة إيه واعملوهالها في اليوم ده، ما تخليهاش تطبخ.

خليها تشوفك بأحسن صورة في اليوم ده وطول اليوم، يعني من الآخر حقق لها أمنيتها فيك، لو شعرك الطويل مضايقها احلقه، لو بتتأخر بره مع أصحابك ارجع بدري في اليوم ده، لو كان فيه حاجة بايظة ومحتاجاك تصلحها من زمان صلحها، لو في فواتير متأخره بسبب إنك كسلت تدفعها، إدفعها على حسابك…وهكذا.

شغلها مسلسلها اللي بتحبه، أو أغنيتها المفضلة، واقلب جو البيت في اليوم كرنفال واحتفال، خليها تعمل وتتفرج على اللي بتحبه.

 

طبعًا أكيد في حاجات أكتر ممكن كل واحد يعملها مع مامته على حسب علاقته بيها، لكن إحنا حاولنا نديكم مفاتيح وأنتم وشطارتكم، وكل سنة وكل أم بخير.