The Definitive Guide to Living in the Capital , Cairo , Egypt

على اسم “مصر” التاريخ يقدر يقول ما شاء زي ما قال عمنا “صلاح جاهين”، والنهارده التاريخ هيحكي باسم “مصر” حكاية جديدة بطلتها بنت من بنات مصر اسمها “رشا قلج”.

الحكاية ابتدت لما الدكتورة المصرية “رشا قلج” قررت تسيب بصمة إنسانية في قارة أفريقيا ونجحت في إطلاق مبادرات إنسانية في مجالات مختلفة كان أبرزها المرأة الأفريقية والتنمية المجتمعية، والنهارده اختارتها مجلة “نيو أفريكان” البريطانية باعتبارها المدير التنفيذى لـ “مؤسسة ميرك الدولية الخيرية” ضمن قائمة ضمت أكثر 100 شخصية تأثيرًا ونفوذًا في أفريقيا في 2019.

القائمة ضمت 100 شخصية من مختلف الدول الأفريقية، ومن مختلف المجالات السياسية والاقتصادية والاجتماعية والرياضية، وكان النجم العالمى “محمد صلاح” والدكتورة “سحر نصر” وزيرة الاستثمار والتعاون الدولي ضمن المتصدرين فيها خلال السنين اللي فاتت.

دول أفريقية كتير مسمية الدكتورة رشا “ماما أفريقيا” تقديرًا لإنجازاتها اللي قامت بيها في مجال العمل الخيري الأفريقي، ونجاحها فى إطلاق حملة “أكثر من مجرد أم” اللي هدفها الأساسي كان مواجهة العنف ضد المرأة الأفريقية اللي اتحرمت من نعمة الأمومة، ونجحت في إنها تخلي مجموعة كبيرة من سيدات الطبقة الحاكمة في أفريقيا يشاركوا فيها.

مبادرات “قلج” نجحت في 35 دولة من دول العالم، ده غير برامجها المجتمعية اللي كان أهمها تأهيل المرأة الأفريقية المحرومة من نعمة الأمومة ماديًا ومعنويًا، وتوفير منح دراسية لتخريج أول أخصائيين في مجال الأورام السرطانية في دول أفريقية، ده غير مساهمتها في تغيير المعتقدات الغلط، ومحاربة العادات غير السليمة والمدمرة زي الجهل والعنف بالفنون والأدب، وده اللي أهلها لإنها تفوز بجوائز كتير في مجال المرأة والتنمية المجتمعية.