The Definitive Guide to Living in the Capital , Cairo , Egypt

بلدنا مصر مهتمة الفترة دي بدرجة كبيرة بالتعليم الجامعي، وعلشان كده هيتم بناء 6 جامعات تكنولوجية جديدة في محافظات مصر المختلفة.. تعالوا نعرف التفاصيل مع بعض.

بحسب تصريحات إعلامية حديثة للدكتور خالد عبدالغفار وزير التعليم العالي والبحث العلمي، مصر مهتمة بشكل كبير بالجامعات التكنولوجية لأنها بتساهم بشكل كبير في إمداد سوق العمل الداخلي والخارجي بخريجين مدربين ومؤهلين بشكل حقيقي، وزي ما إحنا عارفين بدأت الدراسة بالفعل من العام الجامعي 2019- 2020، في ثلاث جامعات تكنولوجية وهي: ( القاهرة الجديدة التكنولوجية، والدلتا التكنولوجية بقويسنا، وبني سويف التكنولوجية).

وأكد د. عبدالغفار أن المرحلة الثانية هتشمل إنشاء 6 جامعات تكنولوجية جديدة، وهي (الجامعة التكنولوجية بسمنود بالغربية، والجامعة التكنولوجية بأسيوط الجديدة، والجامعة التكنولوجية بمدينة طيبة الجديدة في الأقصر، والجامعة التكنولوجية بمدينة 6 أكتوبر، والجامعة التكنولوجية ببرج العرب، والجامعة التكنولوجية بشرق بورسعيد).

والجامعات التكنولوجية بتقبل طلاب الثانوية العامة، وطلاب الدبلوم نظام الثلاث سنوات والخمس سنوات أو ما يعادلها، وخريجي المعاهد المتوسطة، وبيكون من شروطها اجتياز الطلاب لاختبارات قبول بحسب كل جامعة.

وبتهدف الجامعات التكنولوجية لخلق جيل من الخريجين القادرين على مواكبة العصر والتقدم التكنولوجي من خلال تزويدهم بالخبرات والمهارات اللي هتساعدهم على المنافسة في سوق العمل المحلي والإقليمي والدولي.

وهتقدم الجامعات التكنولوجية الجديدة كتير من البرامج الدراسية المتميزة اللي بتخدم الصناعات المعدنية، والخشبية، والهندسية والإلكترونية، والكهربية، وصناعات الغزل والنسيج، والصناعات الغذائية، والصناعات التحويلية، والورق ومنتجاته، والطباعة والنشر، والكيماويات، ومواد البناء، والخزف، والحراريات، واستغلال المناجم والمحاجر، وغيرها من البرامج الدراسية المميزة اللي بتواكب العصر الحالي.