مطبخ جوكا.. بتطبخ ولا بتُلبخ: برنامج طبخ مختلف على راديو صوت الساقية فى رمضان
Dina Mokhtar
ما حدش يقدر ينكر أن برامج الطبخ لسبب ما ممتعة، حتى لو أنت مش في نيّتك أنك تدخل المطبخ وتطبق اللي شفته، مجرد الفرجة بـ تفتح النفس، يمكن لو قلنا برنامج طبخ على الراديو، ممكن الناس تعتقد أن نصف متعة المشاهدة راحت، ولكن في أيام الصيام مجرد سماع صوت الأكل وهو بـ يتحضر يخلي ريقك يجري ويخليك بـ تتخيل كل اللي أنت سامعه حتى الطعم نفسه.
برنامج "مطبخ جوكا.. بتطبخ ولا بتُلبخ" لمقدمته إنجي البطراوي… أيوه هي إنجي بتاعتنا –مديرة تحرير موقع كايرو 360 العربي- مش بس بـ يجوّعنا في رمضان، ده كمان بـ يقدم مجموعة من الأكلات المختلفة، وبـ يقدم نصائح سريعة وأسرار تسهّل الدنيا على كل اللي بـ يحبوا يطبخوا بس لسه أيديهم ما مشيّتش في الصنعة.
أحلى حاجة أن الوصفات سهلة، ومكوناتها متوفرة في أي مطبخ، أو حتى أي سوبر ماركت لو مش موجودة عندك، والوصفات المعقدة إنجي بـ تبسطها وبـ تقترح مكونات بديلة توفر عليك الوقت والمجهود.
في خلال 10 دقائق -وهي مدة البرنامج- بـ تقدم إنجي طبقين: حلو وحادق، وكل يوم بـ تستضيف معاها ضيف مختلف، وبالتالي البرنامج مش عبارة عن دش لمقادير ووصفات وانتهينا، وأحلى حاجة أن بعد ما الحلقة بـ تنتهي خطوات الوصفة بـ تنزل بالصور على صفحة مطبخ جوكا على الفيسبوك، فبالتالي موضوع أنك تتابع البرنامج وفي أيدك ورقة وقلم علشان تلحق تكتب اللي بـ يُقال ما تحملش همّه، وممكن كمان بعد ما تنفذ أطباق اليوم تصورها وإنجي هـ تنشرها على الصفحة باسمك.
وبما أن نجمة البرنامج موجودة معانا في المكتب، قررنا أننا نسألها الأسئلة دي:
إزاي اكتشفتي أنك بـ تحبي المطبخ؟
بعد الجواز، قبله كان الموضوع مقتصر على مساعدة والدتي وبس، ولكن الموضوع اختلف تمامًا لما اتجوزت وتحضير الأكل بقى جزء أساسي من اليوم، وبقيت فى وضع مسئولية، وعلشان أسهل الموضوع على نفسي بدأت أنفذ الوصفات الخفيفة، بعدها شدتني الوصفات غير التقليدية والمبتكرة، فبقيت أنا ابتكر في الوصفات المعتادة اللي بأعملها.
هل عملك كمديرة تحرير كايرو 360 العربي ساعدك في إعداد البرنامج؟
أكيد، لأن إعداد البرنامج بيعتمد على الكتابة؛ ده غير أن عملي كناقدة طعام لمدة 4 سنين خلاني أجرب كم كبير ومتنوع من الأكلات، وده ساعدني في اختيار وصفات جديدة ومختلفة في البرنامج.
هل لاقيتي صعوبة في تقديم الوصفات، وخصوصًا أن البرنامج بـ يُذاع على الراديو؟
صحيح الراديو ممكن يكون بـ يعتمد على التخيل، ولكن لو الموضوع فيه طبخ وخطوات تحضير، الصعوبة هـ تكون أن الناس مش بـ تشوف طريقة العمل، علشان كده عملت صفحة الفيسبوك علشان انشر عليها خطوات الوصفات ومكوناتها، لأن في النهاية العين بـ تأكل قبل ما بـ نتذوق.
طيب احكي لنا عن طقوسك الخاصة في المطبخ…
مافيش طقوس خالص، يمكن أهم حاجة بالنسبة لي يكون الأكل معمول بمزاج وبدون استعجال.
بـ تستمتعي بطبخ إيه أكثر… الحلو ولا الحادق؟
الحادق.
لو أكلة بـ تكرهيها… ممكن تطبيخها وتطلع حلوة؟
لو معمولة بطريقة مبتكرة ممكن أجربها، فيه ناس مثلًا مش بـ تحب السبانخ، لكن لو جربوها مع الكريمة والحمص هـ يحبوها كتير.
طب إيه أكثر أكلة بـ تستمتعي بطبخها؟
أى حاجة داخل فيها خضار… وألوان كثير.
إيه أكبر كوارثك المطبخية؟
الحمد لله مافيش كوارث، فيه بس حوادث المطبخ العادية، ساعات غصب عني باتلسع أو باتعور…
ناس كثير بـ تقول أن الأكل نَفَس وبس… دي حقيقة ولّا أسطورة؟
أهم حاجة يكون الأكل معمول بحب، لأنه بـ يظهر في النتيجة النهائية لأي وصفة.
طيب نصيحة تقدميها لشخص مالوش في المطبخ وعاوز يجرب..
بسطها على نفسك، مش لازم تعمل وصفات معقدة علشان يُقولوا عليك جامد، ودائمًا خلي عندك بدائل، واطبخ بحب.
برنامج مطبخ جوكا بـ يذاع على راديو صوت الساقية فى رمضان يوميًا فى أربعة مواعيد مختلفة: 4 فجرًا، 11 صباحًا، 4 عصرًا، 11 مساءً.. ولو عاوزين تشوفوا صور الوصفات وخطواتها بالتفصيل وكمان تعرفوا معلومات أكتر زوروا صفحة مطبخ جوكا على الفيسبوك أو أكونت الأنستجرام كمان… رمضان كريم!
مقترح
معالم وسياحة
أبرزها "القاهرة التاريخية".. 7 مواقع مصرية على قوائم التراث العالمي
آثار مصرية اليوم العالمي للتراث +1
معالم وسياحة
