The Definitive Guide to Living in the Capital , Cairo , Egypt

​رحلة وتصوير: محمد طلعت

حاليًا في حديقة الأورمان القريبة من جامعة القاهرة تقدروا تستمتعوا بمعرض الزهور 2018 وسط مجموعة خلابة من الأنواع المختلفة اللي بترضي جمهور بيستنى المعرض ده سنة ورا سنة، ولكن السنة دي مختلفة شوية في الأسعار، علشان كده كايرو 360 قررت تزور المعرض علشان تتعرف عليه وتنقل لكم الصورة بشكل عملي.

الدخول

دخول الفرد في المعرض بتذكرة سعرها 2 جنيه وطبعًا الشئ المميز إنك ممكن تدخل بعربيتك لحد جوه علشان الركنة وكده، بس هتدفع على الملاكي 20 جنيه، والنصف نقل 40 جنيه، والميكروباص 14 راكب 60 جنيه، الميني باص 80 جنيه، والنقل الكبير 100 جنيه، وأخيرًا أتوبيس الرحلات 52 راكب بـ100 جنيه.

المعرض

ابدأ يومك إنك تاخد أول يمين وتلف وتدور وتشوف الأسعار وتشتري، وهتلاقى كمان غير الزهور صناعات يدوية، ودي تاني دخلة على اليمين وخاصة بالفنان أحمد وهبة وعندهم حاجات بتبدأ من 15 جنيه زي الطاجن الفخار وبتوصل لـ500 جنيه زي لوحة مرسومة بالرمل الملون.

الأنواع والأسعار

أسعار الزهور مختلفة حسب الحجم والنوع والشكل، وكل سعر وله صاحب بيدور عليه، بتبدأ من 5 جنيه لحد 2500 جنيه، وممكن أكثر.

والأنواع كتير جدًا ولكن إحنا قررنا نرصد أكتر حاجة عليها طلب وكانت الباتونيا والقطيفة وتايلوس بسعر 5 جنيه، أما الديمورفاتكا وجاروينيا وكلانشون وأندونيس سعرهم 10 جنيهات، والياسمين والفل البلدي و مسك الليل الصغير، بـ15 جنيه، فيه كمان كلينتانتا وكلانشون كبير وسنايتي وكرزانتا سعر الواحدة 20 جنيه.

كمان فيه الداليا وفل وسكلمان بسعر 35 جنيه، أما السكلمان نبات داخلي فيه 9 ألوان بـ40 جنيه، ومسك الليل كبير وتراسينا تلاي ألوان داخلية صغير 60 جنيه، وهتلاقى كمان نجيل صناعي للمنازل سعره من 130 لحد 160 جنيه، ونجيل الملاعب يبدأ من 130 للمتر.

ومافوق الـ100 جنيه هنلاقى نبات أزاليا وجوزمانيا والكيميكواي وسرس الليمون بسعر 200 جنيه للواحدة، والأورنيوم سعرها 250 وتوصل لحد 400 جنيه، كمان فيه جدارية تبدأ من 300 جنيه حتى 1500 جنيه، وفيه ياسمين بلوفينس سعرها 500 جنيه، وفيه أحجام صغيرة بـ250 و300 جنيه، أما البشيرة بشكلها الجميل المتداخل سعرها بـ1200 جنيه.

النقل

بعد ما تختار وتشتري كل حاجة هتلاقى ناس معاهم عربية جر، وبينقلوا الحاجة لك داخل أو خارج المعرض لحد عربيتك أو البوابة بسعر 10 جنيهات، ولو أنت معاك كمية كبيرة ممكن تتفق مع عربية ربع نقل تنقل قصارى الزهور بتاعتك لمكانك أو بتطلب من صاحب المعرض يستعين بسائق معرفة له، بس أوعى يتضحك عليك في السعر ولازم تفاصل كمان.

منطقة أطفال

فيه هناك منطقة أطفال وفيها ألعاب كتير، والحقيقة الأهالي كانوا مبسطوين بلعب أطفالهم سواء في الزحليقة أو المراجيح وخلافه.

منطقة مطاعم

فيه منطقة مطاعم خاصة بتعدي البحيرة عن طريق كوبري خشب وفيها أكل وشرب وقعدة في الضل بعيدًا عن حرارة الشمس.

نيصحة من كايرو 360

لما تزور معرض الزهور اللي في حديقة الأورمان، لازم تروح بلبس خفيف ويفضل قطن، ويكون معاك عصير ومياه علشان الحرارة عالية جدًا، ويفضل إنك تروح من 8 حتى 11 صباحًا أو من 5 حتى 8 مساءًا، وده أفضل وقت الجو بيكون فيه كويس، ولازم تلف وتدور وتسأل وتشوف كل البائعين وأسعارهم، ومش مهم تشتري من أول مرة، الأهم إنك تقتنع باللي هتشتريه وميبقاش غالي.