The Definitive Guide to Living in the Capital , Cairo , Egypt

ناس كتير بتحب تشوف الأبراج بتقول لها إيه. خاصة مع قرب بداية سنة جديدة. علشان كده قررنا نسمع توقعات الخبراء، ونقدم لكم في النهاية خلاصة كلامهم عن كل برج في 2019.

برج الحمل

2019 تعتبر من أفضل السنين اللي هتمر على برج الحمل، خاصة في الربع الأول منها. هتتحل فيه كتير من مشاكله، اللي مر بها في نهايات 2018. هيحقق نجاحات كبيرة على المستوى المهني والشخصي. ما ننكرش إن فيه بعض المشاكل الشخصية، ممكن تحصل في نص السنة. لكن هتمر بسلام. ومش هتأثر على علاقاته بشكل كبير.

برج الجوزاء

مواليد الجوزاء حياتهم هتتغير بشكل كبير خلال 2019. خاصة محبي السفر والمطرقعين. هيكون قدامهم فرصة ذهبية لحد نص شهر مايو تقريبًا، علشان يمارسوا كل جنانهم بمنتهى الأريحية. وبالنسبة للسناجل، فالفرصة هتكون متاحة لهم في شهر يوليو علشان يرتبطوا. لكن شهر يونيو بيحمل أخبار غير سعيدة على الصعيد المادي. علشان كده مواليد الجوزاء لازم ياخدوا بالهم من قراراتهم المالية، بداية من أول السنة.

برج الأسد

بدايات 2019 مش هاتقدم تطورات كتيرة لمواليد برج الأسد. لكن بدايةً من شهر سبتمبر لديسمبر، كل الحاجات الجميلة اللي استنوها هتحصل. لازم ننصح مواليد الأسد بالتفكير الإيجابي والمختلف في حل مشاكلهم. لأن التفكير النمطي داخل الصندوق مش هايجيب نتيجة في 2019 خالص.

برج الميزان

مواليد برج الميزان اللي كانوا بيعانوا من مشاكل مادية في 2018. نحب نقول لهم أن المشاكل دي مش بس هاتنتهي. لأ دول كمان هايقدروا يحققوا أرباح مادية كبيرة في نص السنة. ده غير فرص عمل مميزة للناس اللي خسرت وظايفها، أو ماشتغلتش خالص في 2018.

برج القوس

على الرغم من الحظ السعيد في 2018 لمواليد برج القوس، إلا أن حظه هيتراجع في 2019 لحد شهر مايو تقريبًا. بعد كده هيرجع الحظ السعيد تاني لحد أخر السنة. مواليد القوس هايكون عليهم اتخاذ قرارات صعبة على الصعيد العملي والعاطفي خلال 2019. وننصحهم بالتفكير بحكمة، وعدم التسرع في قراراتهم.

برج الدلو

بداية برج الدلو في 2019 هاتكون محيرة شوية. يعني مفيش فشل واضح أو نجاح واضح. لكن مع الوصول لنص السنة، حياته الاجتماعية هتزدهر من خلال صداقات جديدة، وعلاقات اجتماعية مثمرة، ممكن يظهر من خلالها فرص شغل جديدة.. استعدوا يا مواليد الدلو.

برج الثور

للأسف 2019 مش هتكون أفضل سنة بالنسبة لمواليد برج الثور. لكن الكويس إنهم ممكن يتجاوزوا الأحداث الصعبة، على الصعيد العاطفي والمالي والعملي، لو عرفوا ياخدوا بالهم من بداية السنة. وده باتخاذ قرارات احترازية من دلوقتي.

برج السرطان

2019 هي سنة الحظ، على الصعيد المهني لمواليد برج السرطان. الشباب اللي مش لاقيين شغل، فرصتهم في الحصول على وظيفة هتكون أكبر. أما اللي بيشتغلوا فعلًا، نحب نقول لهم أنهم ممكن يحصلوا على ترقية. أو أخبار سعيدة بشكل عام. وكمان عاطفيًا هايكون فيه أخبار كويسة جدًا لمواليد السرطان.

برج العذراء

ماشوفناش حد حظه كويس في 2019، زي مواليد برج العذراء. سواء على الصعيد المهني، المالي، أو حتى العاطفي. كل الأخبار هتكون كويسة، وكل الأحداث هتكون سعيدة. ومن بداية السنة لنهايتها تقريبًا، كل يوم هيكون فيه خبر سعيد وجديد.

برج العقرب

لو كنت من مواليد برج العقرب، وشغلك له علاقة بالإبداع والأفكار المتجددة. سنة 2019 هتكون الأروع بالنسبة لك. لأن الفترة من بداية شهر مارس لنهاية السنة، هايكون فيها أفكار كتير جديدة ومبتكرة. كمان على الصعيد العاطفي، فيه فرص كويسة جدًا للتوافق مع أشخاص تانية.

برج الجدي

برج الجدي في 2019 مش هايكون في أفضل حالاته. على الأقل في الفترة الأولى من السنة. وهياخد بعض القرارات اللي هاتكون صادمه بالنسبة له. خاصة على المستوى العاطفي والإنساني. كمان الشغل ممكن يكون فيه بعض العقبات اللي بنحذره منها.

برج الحوت

وأخيرًا برج الحوت. اللي مستنياه أيام مميزة جدًا في 2019، على الصعيد المهني والعاطفي. لكن ده مش هينعكس على الجانب المالي. وهيمر ببعض التقلبات والخسائر المادية. خاصة في فترة نهاية السنة. علشان كده بننصح مواليد برج الحوت ياخدوا حذرهم خلال الربع الأول من 2019.