The Definitive Guide to Living in the Capital , Cairo , Egypt

 بتدور على الجديد؟ طيب بتحب المغامرة والنط من المرتفعات والشعلقة على الحبال وغيرها؟  يبقى “دير سمعان الخراز” في منطقة المقطم هو المكان اللي بتدور عليه، فلو كنت من عشاق المغامرة لازم تروح تجرب بنفسك وتستمتع.

الدير موجود في منطقة “المقطم” بعد عزبة الزبالين، لما توصل هناك اسأل الأمن عن منطقة ألعاب الـ “High Ropes” اللي بيديرها “ماريو” وخلي بالك إنك لازم تتصل بيه قبل ما تروح علشان تشوفه موجود ولا لأ، وهو كندي الجنسية وعايش في مصر بقاله 25 سنة.

منطقة الألعاب دي كلها حبال في وسط الجبل، وتقدر تتصور فيها وتقعد فيها ببلاش من غير أي رسوم أو مشروبات، وبعدها تقدر تقرر هتلعب ولا لأ، وممكن تختار لعبة من 4 ألعاب أو تلعب كل الألعاب بـ300 جنيه بس، ومتقلقش هيكون في لبس مخصوص لحمايتك من أي صدمات أو وقعات “Safety” وهو عبارة عن “خوذة – شورت – حزام”.

تعالى نشوف منطقة الألعاب فيها إيه كمان:

Zip Line:

اللعبة دي عبارة عن برج بتطلع عليه وتتربط في حبل، وتتزحلق وانت شايف منطقة المقطم بالكامل حواليك، ولازم تكون ثقتك بنفسك كبيرة علشان تعرف تستمتع، وخلي بالك إن اللعبة ليها توقيت محدد، وهو قبل وقت الغروب، علشان تعرف تستمتع بالمناظر من الجو، وسعرها 75 جنيه.

تسلق الصخور:

ودي بقى محتاجة طاقة وفيتنس عالي، علشان بتبذل فيها مجهود بجد، وبتطلع لارتفاع عالي جدًا، علشان تضرب الجرس وتنزل، وطبعًا بتكون متأمن ومربوط علشان لو إيدك فلتت ماتوقعش، وكمان فيه شخص محترف بيكون مربوط معاك علشان عملية التوازن، وسعر اللعبة 50 جنيه.

الحبال المنخفضة:

هتحس فيها بمتعة إنك تمشي على حبال وجسر، بس لازم تحافظ على توازك، بس في حالة إنك اتزحلقت، متقلقش، هتنزل على حبل تاني يخليك تقدر تكمل المشي على الحبال، وسعر اللعبة 75 جنيه.

لعبة الإثارة:

لو قررت إنك تروح، وعايز توصل للمكان عن طريق المواصلات، هتركب عربية من السيدة عائشة واطلب من السواق ينزلك “دير سمعان”، وهينزلك في مكان قريب، وبعدها هتاخد توك توك بـ 5 جنيه، يوصلك لحد الباب، ومتنساش تروح بلبس رياضي علشان تتحرك براحتك، ولازم تكون 18 سنة لأن أقل من كده لازم يكون معاك ولي أمرك علشان يمضي على اقرار انك سليم صحيًا.

المكان شغال كل يوم ما عدا الأحد، وده رقم تليفون ماريو للحجز: 01200140662.

صفحتهم على الفيسبوك: Mario High Ropes Team