The Definitive Guide to Living in the Capital , Cairo , Egypt

وسط البلد منطقة عظيمة ومهمة في قلب القاهرة، كل مبنى من مبانيها التاريخية بيحكي قصة مختلفة عن زمن القاهرة الجميل، ومن المباني اللي هترجعك بالزمن لفترة مهمة من تاريخ عاصمتنا الجميلة، هي فنادق القاهرة الخديوية، تعالوا نتعرف على أشهر 3 فنادق في وسط البلد.

 

بتتميز فنادق القاهرة الخديوية بأعدادها الكبيرة وأسعارها الرخيصة، مقارنة بالفنادق العالمية التانية الموجودة على أطراف وسط البلد، أو المطلة على مجرى نهر النيل. أحياناً، بتكون فنادق القاهرة التاريخية مباني مستقلة بذاتها، أو مجرد أدوار محددة داخل بعض الأبنية التراثية.

ميزة الإقامة في فنادق وسط البلد، إنها بتخليك قادر تستمتع بشوارع وسط القاهرة، زي شارع قصر النيل، أو شارع طلعت حرب، وبتوصلك بسهولة لأطرافها، سواء ميدان التحرير في الغرب، أو ميدان الأوبرا والعتبة في الشرق، ومن شارع رمسيس في الشمال لحد باب اللوق والمنيرة في الجنوب.

وبتشبه فنادق وسط البلد في معمارها التراثي إلى حد كبير المعمار الأوروبي.

ورغم إن عمر بعضها بيقترب من 100 سنة، إلا إنها مزودة بوسائل تكنولوجية وترفيهية حديثة، زي أجهزة التكييف وشبكات الإنترنت وأجهزة التلفزيون، وغيرها.

ومن أهم فنادق وسط البلد:

 

فندق “كوزموبوليتان”

أحد أقدم فنادق القاهرة الخديوية، وأكبرها حجمًا، تأسس سنة 1923 على يد المعماري الإيطالي “ألفونسو ساسوو”، تحت اسم “متروبوليتان”، وهو اسمه الأصلي القديم، لكن بدايته الفعلية كانت في سنة 1928؛ السنة اللي شهدت افتتاحه.

فندق “كايرو إن”

وده بيطل على ميدان طلعت حرب، وبيعتبر من أجمل أماكن الإقامة في وسط القاهرة، بسبب قربه من ميدان التحرير، ومعظم الأماكن الحيوية المصرية، زي نهر النيل والمتحف المصري، والمتنزهات العامة والخاصة، والمراكب النيلية. وشارع طلعت حرب فرصة لمحبي السير في الأماكن التراثية، لإنه بيضم مباني قديمة بمعمار فريد، زي عمارة يعقوبيان الشهيرة، اللي كانت بطل لرواية اتحولت لفيلم سينمائي للنجم عادل إمام.

 

فندق “كايرو خان”

بيقع في شارع 26 يوليو، وبتتمتع غرفه بتصميم راقي وهادئ، وبيتميز بموقعه القريب جدًا من المتحف المصري في ميدان التحرير.