The Definitive Guide to Living in the Capital , Cairo , Egypt

الحياة في كايرو

نصائح سريعة لعزومة رمضانية ناجحة في بيتك

الشيف سرحان رمضان 2018 ست البيت كاترينج عزومات رمضان مطعم بدوية نصائح رمضان
نصائح سريعة لعزومة رمضانية ناجحة في بيتك
بواسطة
Rasha Zeidan

بصوا يا جماعة من الأول كده، أنا مش خبيرة في التغذية أو الإتيكيت ولا أي حاجة من كل ده، بس أنا بقى عملت عزومات كتييير، لأعداد كبيرة وصغيرة، يعني بحب أعزم أصحابي وقرايبي لحد ما أخدت خبرة في تفاصيل هنتكلم فيها مع بعض ونشارك بعض فيها.

كون أنك تجمع أهلك وحبايبك وأصحابك عندك في البيت دي حاجة حلوة وجميلة، بس قبلها بتتعب، وبعدها برضه بتتعب، بس كل ده بيهون لما الأكل بيطلع حلو والناس تنبسط، وأنا هنا هساعدك بشوية أفكار بسيطة تخليكي مستريحة في عزومتك.

لما تحددي ميعاد العزومة حاولي أنها تكون بعد أسبوع من دعوتك للناس، وابدئي بشراء الخضار واللحوم، وقسمي الشغل فيهم على يومين أو تلاتة، واللي يخلص يتشال في الفريزر، وبعد كده ابدئي في ترتيب الشقة، واعملي جدول كل حاجة عايزة تعمليها، واكتبي كل اللي عايزة تعمليه، علشان ماتنسيش، وطبعًا لازم تركزي في مظهرك ومظهر أولادك، ولازم تختاري هتلبسي إيه وكمان الأولاد هيلبسوا إيه، علشان تبقي محضرة الملابس جاهزة ومكوية.

لازم تبقي عاملة خطة كاملة خلال الأسبوع ده، بداية من قايمة الأكل والمظهر وترتيب البيت وشراء الحاجات، والنواقص وغيره، طبعًا مش محتاجة أقول لك إننا كمصريين عندنا ثوابت في العزومات زي المحاشي واللحوم والفراخ والمكرونة الباشميل والبط والرومي.

إحنا كمان ممكن نساعدك بمنيو عزومة حلوة وتقدري تحضريها قبلها بيوم، وأنا عملتها وكنت مرتاحة قوي:

السلطات (خضرا ومخلل)

المقبلات (سبموسك باللحم والجبن)

الرئيسي (ورق عنب – رز بالكبد والقوانص – فراخ مشوية)

أنا بقى عملت ايه.. أنا عملت ورق العنب وشيلته في التلاجة، وعملت السبموسك وشيلتها في الفريزر، وعملت الكبد والقوانص برضه واتشالت في التلاجة، والفراخ كانت متبلة قبلها بيوم وفي التلاجة، وكان يوم العزومة تسوية بس للأكل.. شوفتوا بقى المنيو تقيل إزاي بس التخطيط بيريح كتير..

كمان لو الضيوف أصحابنا مش ناس أول مرة يدخلوا البيت ممكن الأطباق تكون فويل علشان ترتاحي من غسل الأطباق..

وكل اللي فات ده ينفع نحضره قبلها بكام يوم والملحوظة اللي لازم تاخدي بيها (مافيش داعي والنبي يا جماعة للافتكاسات في اليوم ده) يعني بلاش نجرب في الناس وصفات جديدة، لمجرد أنك عايزة تعملي عزومة مختلفة، ويا فرحتي لو عملتي عزومة مختلفة بس طعمها غريب ومش محبوب، الأكل على ذوق الضيف مش على ذوقك أنت.

 

ونصيحتنا ليكوا بقى هي الأماكن اللي ممكن تسعفك وتجيب لك أي صنف مش هتلحقي تعمليه بنفسك، وعلى فكرة بيبقى أكل بيتي مش مطاعم..

عندك مطعم بدوية اللي في سيي ستارز، الشيف سرحان اللي موجود في مصر الجديدة والمعادي والمقطم، أكل بيتي في المعادي، مطعم الست أمينة خلف كارفور المعادي، وفيه ست البيت كاترينج وليه 3 فروع (حدايق القبة – الداون تاون مول بالقاهرة الجديدة – مصر الجديدة)

 

هاه خلاص الناس وصلت طب تمام كل حاجة في مكانها، وانتي مش متوترة أنت عارفة بتعملي إيه، والسفرة جاهزة والعصاير وقمر الدين من الصبح في التلاجة، والمخلل جايبينه من قبلها بيومين.. كده أنت تمام، والناس هتاكل وتنبسط، وبعد العزومة ماتنسيش تقسمي الأكل لوجبات وعلى طول على الفريزر، واختاري وقت العزومة تكوني فيه مرتاحة نفسيًا ومزاجك عال العال.

وكل سنة وأنتم طيبيين.

مقترح