The Definitive Guide to Living in the Capital , Cairo , Egypt

برنامج الأغذية العالمي بالتعاون مع النجمة هند صبري أطلقوا حملة رقمية مبتكرة لجمع التبرعات خلال شهر رمضان، الحملة دي بتشجع مستخدمي الهواتف الذكية في العالم كله على التبرع، والهدف هو دعم الفئات المحتاجة من ضحايا النزاعات في منطقة الشرق الوسط في رمضان.

من خلال تطبيق”ShareTheMeal” أو “شارك بوجبة”، اللي طوره البرنامج لجمع التبرعات، هيقدر مستخدمين الهواتف الذكية في جميع أنحاء العالم مساعدة الأسر المحتاجة في سوريا واليمن عن طريق مشاركة إفطارهم في شهر رمضان.

هند صبري، سفيرة النوايا الحسنة لبرنامج الأغذية العالمي بتقول لـ كايرو 360: “لحظة الإفطار من أجمل اللحظات التي بتتكرر كل يوم طوال شهر رمضان، لما بتجتمع الأسر والأصدقاء علشان يشاركوا الأكل”.

وأضافت: “لكن للأسف، ما بيتمتعش الكل بميزة تناول الأكل وقت المغرب؛ علشان كتير من الأطفال بيعانوا من الجوع في مختلف أنحاء العالم. وعلشان كده يشرفني أعلن بالتعاون مع برنامج الأغذية العالمي عن الفكرة دي، لأني فعلًا مؤمنة بأن تطبيق ShareTheMeal بيوفر فرصة لمساعدة ناس محتاجة”.

أثناء شهر رمضان، ما بتعرفش ملايين الأسر في اليمن وسوريا هيجيبوا منين وجبتهم التالية، لإن الصراع الدائر في منطقة الشرق الأوسط أجبر الملايين على النزوح من بلادهم، وهجروا منازلهم وأعمالهم.

بتقول هند صبري: “هلتزم باستخدام تطبيق SharetheMeal  وهشارك إفطاري كل يوم خلال شهر رمضان، وهطلب من أصحابي وأسرتي وجمهوري يعملوا كده كمان طول شهر رمضان الفضيل وحتى بعد انتهاء رمضان، الموضوع في غاية السهولة”.

من خلال تنزيل التطبيق والانضمام إلى “السفرة”، وهي الميزة الجديدة في تطبيق ShareTheMeal اللي بتتيح فرصة العطاء الشهري، هيقدر المتبرعين مواصلة تقديم تبرعاتهم بعد انقضاء شهر رمضان، وبكده هيدعموا الأسر المحتاجة طول العام. ومبلغ قليل زي 15 دولاراً كفيل بأنه يغطي الاحتياجات الأساسية لطفل جعان لمدة شهر كامل ويقدم الدعم العاجل لعدد من أشد الأسر احتياجاً في العالم.