The Definitive Guide to Living in the Capital , Cairo , Egypt

نجحت وزارة النقل في إنها تاخد أولى خطوات تنفيذ مشروع مونوريل العاصمة الإدارية الجديدة و6 أكتوبر، وهيتم تنفيذ المونوريل الخاص بالعاصمة في 34 شهر، ومونوريل 6 أكتوبر هياخد 42 شهر، وفي السطور اللي جاية هنقولكم على كل المعلومات اللي محتاجين تعرفوها عن المونوريل اللي بيدخل مصر لأول مرة.

هيبدأ تشغيل مونوريل العاصمة الإدارية الجديدة في مايو 2022، وهيكون بمساحة 54 كيلو متر، وهيشمل 21 محطة، هما  “الاستاد، هشام بركات، نوري خطاب، الحي السابع، المنطقة الحرة، المشير طنطاوي، كايرو فيستيفال، حي نرجس، المستشفى الجوي، محمد نجيب، الجامعة الأمريكية، ميدان النافورة، إعمار، البروة، الدائري الأوسطي، محمد بن زايد، الدائري الإقليمي، الشويفات، فندق الماسة، حي الوزارات، والعاصمة الإدارية”.

أما مشروع مونريل 6 أكتوبر فهيكون على طول 35 كيلو متر، وهيشمل 10 محطات حددتهم الوزارة في” المنطقة الصناعية بمدينة 6 أكتوبر، جامع الحصري، محطة أكتوبر، ميدان جهينة، محطة زايد، هايبر، محطة طريق إسكندرية الصحراوي، المنصورية، محطة الطريق الدائري، وجامعة الدول العربية”، وهيتوصل المونريل بمحطة بولاق الدكرور “الخط الثالث” علشان يخدم أكتر المواطنين.

مشروع مونريل العاصمة الإدارية الجديدة و6 أكتوبر هيكون مساره على كباري علوية، وهيتنفذ عن طريق تحالف كندي مصري، وهتكون سرعته 80 كيلو متر في الساعة، ومن المتوقع أنه ينقل 45 ألف راكب في الساعة لكل خط، وهيكون التشغيل لتحالف كندي ياباني لمدة 30 سنة.