The Definitive Guide to Living in the Capital , Cairo , Egypt

حميم هو الكلمة الأقرب والأكثر تعبيرًا عن هيلتون شاركس باي في الساحل الشمالي، طلعنا أجازات كتير خارج القاهرة، لكن من المرات القليلة اللي علمت معانا وخلقت لينا ذكريات وشعور حلو خلانا رغم بعد المسافة لو فكرنا مش هنتردد إنا نرجع تاني لنفس المكان، وده قرار نادر زي ما كلنا عارفين لما الواحد يروح مكان ويقرر بكامل إرادته أنه يرجع له تاني عن حب.

الفندق بيدخل ضمن حملات تنشيط السياحة الداخلية كتير، متابعة بسيطة ممكن تساعدكم تطلعوه بتمن بسيط، نبدأ معاكم بقى من البداية، أيا كان الطريق اللي أنت جاي منه، بري أو طيران، الفندق بيوفر خدمة الليموزين اللي بتاخدك من على المحطة للفندق بـ 100 جنيه.

في استقبال الفندق الإجراءات بتاخد شوية وقت، لكن العائلة بتقدر تقعد في البهو الواسع، لحد لما الاجراءات تخلص والنزيل يختار بين الإقامة الكاملة بكل الخدمات فطار وغدا وعشا وسناكس أو بنص الخدمات فطار وعشاء، وللتفريق بين نوعية الخدمة المقدمة بيتم ربط أسورة بلاستيك على معصم النزيل علشان يبان هو من أي نوع.

بياخدوك لغرفتك واللي مساحتها معقولة جدًا، وطبعًا مش هنتكلم عن النظافة والترتيب، صحيح مش أفضل حاجة لكن مقبولة بالنسبة لناس بتدقق جدًا في مستوى النضافة، يعني مش وارد تلاقي شعرة على السرير من نزيل سابق زي ما حصل معانا في فندق الواحة، ومش وارد تبقى شاكك في نضافة الحمام لأنه بيلمع هو والفوط وكل حاجة.

في غرف بتطل على البحر مباشرة وغرف بتطل على حمامات السباحة وغرف بتطل على الحديقة، كان حظنا اللي بتطل على البحر وكان مشهد جميل.

أكتر حاجة لفتت انتباهنا وماقدرناش ننساها لحظة بوفيه الهيلتون، بنتكلم عن الاتقان والنضافة والاهتمام، وسط شكاوي كتير من أصدقائنا اللي نزلوا في فنادق تانية من سوء نوعية الأكل المقدم وعدم جودته… في هيلتون شاركس باي كان الأكل متعة إضافية، خاصة إن الإقامة الكاملة بتوفر لك إلى جانب المطعم الرئيسي فرصة لتناول وجبة عشاء بالمطعم الإيطالي مرة واحدة خلال الإقامة وده قصة تانية خالص.

الشيف المسئول عن المطعم متعاون جدًا، الحاجة الوحيدة اللي ضايقتنا أنه كان بينا أطفال عندهم حساسية طعام وطلبنا من الشيف ينصحنا وسألناه عن أكل خالي من البروتين البقري لكن بسبب غلطة اكتشفنا بعد ما أكلوا أن الأكل كان فيه لبن وللأسف تعبوا، لذلك لو كنتم نزلاء بتعانوا من الحساسية لازم تاخدوا بالكم كويس جدًا جدًا وأنتم بتاكلوا وبلاش خالص البطاطس المهروسة عندهم لأنها غالبًا بتتهرس بلبن أو زبدة.

مهما كتبنا مش هنقدر نحكي عن المتعة اللي شوفناها في هيلتون شاركس باي، لكن من المشاهد اللي مش ممكن تنسوها قعدتكم على البحر وأنتم بتاكلوا السناكس اللي بيقدمها مطعمهم وبتشربوا  عصير أو مياه غازية أو خمور لو كنتم بتشربوها، المطعم العالي عن مستوى البحر وفي نفس الوقت مفتوح عليه ممتع جدًا جدًا.

المكان فيه أكثر من بيسين للأطفال وللكبار، وكان من أمتع الحاجات، للأسف مافيش أكوا بارك أو العاب مائية في الفندق غير زحليقة في بيسين واحد فقط.

من العيوب القليلة في الفندق إن المساحة المتاحة ليه على البحر جاية في منطقة صخور، لذلك نزول البحر مش خيار هناك، غير أنه عميق ومش آمن كفاية لأطفال ينزلوه، اللي بيحبوا الغطس هيستمتعوا جدًا لأنه الفندق بيوفر بمساعدة كابتن سباحة فرصة النزول لمكان عمقه تلاتة متر في البحر عشان الناس تخوض التجربة، ده غير الخدمات التانية زي البنانا بوت والطيران فوق قارب في نص البحر، والقارب الزجاجي بأسعار من 150 لـ300.