The Definitive Guide to Living in the Capital , Cairo , Egypt

أعلنت وزارة الاتصالات المصرية عن إطلاق تطبيق جديد باسم “واصل”، واللي هيساعد ذوي الهمم من الصم والبكم يعرفوا كل حاجة عن فيروس “كورونا” المستجد اللي انتشر في العالم كله وأصيب بيه أكتر من 2 مليون إنسان، وفي السطور الجاية هنقول لكم كل اللي محتاجين تعرفوه عن التطبيق المهم ده وطريقة تشغيله.

التطبيق متاح حاليًا لمستخدمي نظام أندرويد، وبيحتوي على 3 اختيارات، “نجدة – إسعاف – مطافي” ولو أنتم حابين تعرفوا أكتر عن فيروس “كورونا” بتضغطوا على اختيار “إسعاف”، وبتسجلوا بياناتكم “الإسم – السن – رقم التليفون” وبتحددوا سواء كنتم من ذوي الهمم اللي عندهم إعاقة سمعية أو صعوبة تخاطب، وبعدها بتضغطوا على اختيار الانتهاء وبتتحولوا لمكالمة فيديو.

بيرد على مكالمة الفيديو من خلال التطبيق متخصصين موجودين 24 ساعة طوال أيام الأسبوع، وبيتكلموا معاكم بلغة الإشارة، وتقدروا تسألوهم وهما هيساعدوكم في الإجابة عن كل حاجة تخص فيروس “كورونا” المستجد وطرق الوقاية، ولو لا قدر الله عندكم الأعراض هيقولوا لكم تعملوا إيه وهيوجهوكم تروحوا فين.

التطبيق هو مشروع من مشروعات الأكاديمية الوطنية لتكنولوجيا المعلومات للأشخاص ذوي الهمم، وشعارهم “دمج – تمكين – مشاركة”.

لتحميل تطبيق “واصل” لمستخدمي أجهزة أندرويد اضغطوا هنا.

تقدروا تعرفوا أكتر عن الأكاديمية من خلال موقعهم الإلكتروني من هنا.

أو زوروا صفحتهم على فيسبوك من هنا.