The Definitive Guide to Living in the Capital , Cairo , Egypt

“يهمني الإنسان، ولو مالوش عنوان”، الجملة العبقرية اللي سمعناها في واحدة من أجمل أغاني الكينج محمد منير، حدوتة مصرية، واللي لما بنسمعها بتصحى فينا معاني إنسانية جميلة.. الجملة دي من الأغنية هي شعار غير رسمي لبعض منظمات المجتمع المدني اللي ظهرت مؤخرًا في مصر، وبالفعل بتعمل مجهود كبير مش بس في القاهرة، ولكن في كتير من محافظات مصر، واللي مهمتها هي إنقاذ المشردين من برد وقسوة الشوارع.

المنظمات دي قرر القائمين عليها إنقاذ كل إنسان عايش في الشارع ومالهوش بيت أو أهل يرعوه، ومن أهم المنظمات دي، واللي أثبتت جدية حقيقية في إنقاذ البشر بغض النظر عن لونهم، أو دينهم، أو حتى جنسهم، مؤسسة “معانا لإنقاذ الإنسان”، ومؤسسة “دار الفريد لخدمة المتشردين”، وخلال السطور الجاية هنقول لكم على كل اللي محتاجين تعرفوه عن المؤسستين دول، وإزاي تتواصلوا معاهم لو لقيتوا انسان مشرد في الشوارع ومحتاج مساعدة.

مؤسسة “معانا لإنقاذ الإنسان”، بتسعى لإنقاذ البشر من ساكني الشوارع، وكانت بداية الفكرة من شارع رمسيس بوسط القاهرة، وأول حالة كانت لما المهندس محمود وحيد ساعد عجوز مشرد كان وقتها في شارع رمسيس بيعاني من الجوع والمرض، ومن هنا قرر يساعده، وبعدها قرر يكمل في مساعدة الإنسان ويسعى للم شمل كل الناس في دار اتبنت لهم مخصوص علشان تقدم لهم كل الخدمات اللي تحفظهم وتحفظ كرامتهم وتقدم لهم لبس وأكل وشرب وكمان رعاية صحية.

مؤسسة “معانا لإنقاذ إنسان” لها 3 فروع في القاهرة “الدقي – الهرم – وسقارة”، وفيها 92 موظف و16متخصص ما بين تمريض وأخصائيين نفسيين، مهمتهم جميعًا يوصلوا للإنسان اللي بيعرفوا معلومات عن مكانه وحالته.

لو قابلتم شخص مشرد في الشارع تقدروا تبلغوا عن مكانه عن طريق التواصل مع المؤسسة من خلال صفحتهم على الفيسبوك من هنا.

أو من خلال رقم التليفون 01210810856.

أما مؤسسة “الفريد لخدمة المتشردين”، فكانت بتساعد بشكل تطوعي بداية من سنة 1992 كل إنسان محتاج من خلال توفير علاج ومأكل ومشرب وملبس، لكن في سنة 2019 تم اعتمادها وترخيصها كمؤسسة رسمية لمساعدة الإنسان في الشوارع عن طريق وزارة التضامن الاجتماعي، وشعارهم هو: “بِالصَّوَابِ أَجَبْتَ اِفْعَلْ هذَا فَتَحْيَا”، والدار فيها حوالي 40 ألف متطوع في كل أنحاء الجمهورية بيقوموا بتوفير مستلزمات المشردين في الشوارع واحتياجاتهم.

تقدروا تتواصلوا معاهم وتبلغوا عن حالات محتاجة مساعدة من خلال صفحة الفيسبوك من هنا.

أو عن طريق رقم التليفون 01033880699.