The Definitive Guide to Living in the Capital , Cairo , Egypt

يوم السبت 14 يوليو هيكون معادنا مع حدث عظيم جديد أعلنت عنه وزارة الآثار، وهو افتتاح هرم “سنفرو الجنوبي” والمعروف بالهرم المنحنى، في منطقة آثار دهشور، وده بعد الانتهاء من أعمال ترميمه، ده غير إن الافتتاح هيكون متزامن مع الإعلان عن اكتشاف جديد في نفس المنطقة.

أعمال ترميم الهرم كانت من قاعدته ولحد ارتفاع 4 متر تقريبًا، وشملت أعمال الترميم تجميع الأحجار اللي وقعت من الهرم وإعادتها لأماكنها الأصلية، مع وضع مادة خاصة بين فواصل وفراغات الأحجار اللى كانت فقدت المونة بتاعتها بسبب عوامل التعرية، وده بغرض المحافظة علي القيمة الأثرية للهرم، ده غير ترميم الهرم من جوه كمان.

هرم “سنفرو” بيعتبر ثالث أكبر هرم بعد هرم خوفو والهرم الشمالى‫ للملك سنفرو المعروف باسم الهرم الأحمر‫.

ارتفاع هرم سنفرو حوالي 98 متر، ويعتبر أول هرم اتبنى بالشكل المنحني ده بعد هرم زوسر المدرج، وفي اشاعات بتقول إن تغيير زاوية الميل اللى أدت لانحناء الهرم، بسبب مشاكل إنشائية ظهرت في مرحلة البناء.