The Definitive Guide to Living in the Capital , Cairo , Egypt

تبقى غلطان لو فاكر إن النجاح اللي حققته وكالة ناسا الأمريكية بيعود للعقول الغربية وبس، المصريين كمان ليهم بصمة مميزة جدًا في الوكالة الشهيرة، وقدروا يثبتوا للعالم إن المصري قادر على تحقيق النجاح والتميز.. في السطور الجاية هنعرفكم على 4 مصريين بتدين لهم وكالة ناسا بفضل كبير.

فاروق الباز

هو واحد من أشهر علماء الفضاء في العالم، اتولد يوم 2 يناير سنة 1938 في مدينة الزقازيق، واتخرج من جامعة عين شمس سنة 1958 بشهادة في الكيمياء والجيولوجيا، وحصل على الماجيستر عام 1961 من معهد علوم المعادن في أميركا، وبعدها حصل على الدكتوراه سنة 1964 في علم الجيولوجيا الاقتصادية.

اختارته وكالة ناسا سنة 1967 علشان يكون ضمن الفريق التاريخي اللي أنجز هبوط الإنسان على القمر، وتم تكليفه باختيار ودراسة 16 منطقة مناسبة لهبوط الرواد على القمر.

عصام معروف

اشتغل مع وكالة ناسا ضمن فريق استكشاف نظام كوكب زحل، وعمل دراسات كتيرة عن طبيعة الكواكب وبيئتها، كمان شارك العالم المصري عصام معروف من سنة 1975، في اكتشاف الكواكب عن طريق المسبارات الفضائية.

عصام حجي

بيشتغل في قسم محركات الدفع الصاروخي بوكالة الفضاء الأميركية، وفي مجال التصوير بالرادار، وبيشرف على مهام علمية لاسكتشاف كواكب المجموعة الشمسية، كمان بيشارك في أبحاث استكشاف الماء في المريخ وتدريب رواد الفضاء وتصميم المركبات.

هاني مصطفى

بيشرف على الأبحاث الهندسية بين وكالة الفضاء الأميركية ناسا وشركة “برات آند وتني” لصناعة محركات الطائرات، وله 23 براءة اختراع في مجال تطوير وتصميم مكونات محركات الطائرات، وأكثر من 100 بحث هندسي في رفع كفاءة المحركات.