The Definitive Guide to Living in the Capital , Cairo , Egypt

الصورة الرئيسية: karim Cullen

بقلم: رنا شرف

عيد الحب من المناسبات الجميلة اللي ماكناش بنهتم بالاحتفال بيها زمان في مصر، بس في السنين الأخيرة، أصبح للمناسبة دي اهتمام كبير، وبمجرد ما بنمشي في شواع القاهرة بنلاحظ ديكورات المحلات وانتشار الدباديب والورود.

لكن هنا خلونا نوضح إنه مش شرط الاحتفال بعيد الحب يكون بين حبيب وحبيبة بس! ده ممكن يكون عيد حب للعائلة كلها أو للأصدقاء وزملاء العمل، باختصار أي حد بنحبه بجد يستحق نقول له كل سنة وأنت طيب في يوم عيد الحب.

وبمناسبة عيد الحب، فكرنا في كايرو 360 نكلمكم عن 5 أماكن غير تقليدية في القاهرة تقدروا تحتفلوا فيها بعيد الحب.

 

مطعم بوتري الزمالك

الناس اللي بتحب الأكل هيلاقوا نفسهم يوم عيد الحب سعداء وهم في بوتري الزمالك.

المكان حلو جدًا، وهو مطعم وكافيه مناسب قوي ليوم زي عيد الحب، لإن إطلالته مميزة على النيل، وطبعًا مافيش أحلى من كده قعدة وإحنا بناكل. كمان المكان أسعاره معقولة.

العنوان: 5 شارع أبو الفدا، الزمالك.

 

حديقة الأسرة

أما الناس اللي بتحب الهدوء والطبيعة والتصوير، فبنرشح لهم مكان هينسيهم الدنيا، وهو حديقة الأسرة.

حديقة الأسرة من الأماكن الجميلة اللي بتناسب كل الناس اللي بتدور على يوم رايق. سعر التذكرة 40 جنيه، والمكان من اسمه مناسب للأسرة كلها، وطبعًا هناك التصوير هيكون تحفة.

العنوان: مدخل الرحاب 2 الكيلو 26 طريق القاهرة السويس الصحراوي.

قصر البارون     

الناس اللي بتحب أجواء التاريخ الساحرة، بنرشح لكم قصر البارون، اللي اتظلم بإنه مكان رعب أو غامض، رغم إنه من أجمل الأماكن في القاهرة.

المكان مميز، وفعلًا مناسب لخروجة لذيذة وتصوير حلو مع الشخص اللي بتحبه من قلبك.

المكان هيرجعك لجو تاريخي جميل، وحقيقى هيعجبكم يوم عيد الحب.

سعر التذكرة  20 جنيه، وهناك ممكن تشرب مشروبات في كافيه حديقة القصر، والأسعار هناك معقولة.

 

قرية فجنون التجمع الخامس

عشاق المغامرات غير التقليدية أكيد هيلاقوا نفسهم في قرية فجنون، وهي مكان مناسب للناس اللي بتعشق الطبيعة، والمكان مناسب لكل الأعمار، وهناك هتركب خيل وهتقدر تشارك في أنشطة كتير زي الرسم وأنشطة يدوية ممتعة أكتر.

بيميز المكان الجو والأكل الريفي.

سعر الدخول 100 جنيه للفرد.

العنوان: هايد بارك التجمع الخامس، بوابة 2 شارع التسعين الجنوبي.

 

برج القاهرة

القاهرة فيها مكان مميز جدًا ومش واخد حقه، وهو برج القاهرة، اللي بنعتبره مكان رومانسي جميل ومناسب قوي للناس اللي بتحب السماء الصافية والجميلة.

سعر التذكرة 40 جنيه، وهناك كمان فيه مطعم دوار لازم تجربوه يوم عيد الحب.

العنوان: جزيرة الزمالك.

 

وأخيرًا..

كل سنة وأنتم بكل خير! ونحب نعرف هتقضوا عيد الحب فين في القاهرة؟