The Definitive Guide to Living in the Capital , Cairo , Egypt

راحتنا الجسدية والنفسية أمر ضروري وأساسي جدًا علشان نقدر نواصل شغلنا اليومي بأفضل شكل. لكن فيه أوقات بنحس إننا بنزهق من الشغل بسرعة أو مستوى أدائنا بيقل، حتى لو مافيش أي مجهود إضافي بنعمله.. فيا ترى إيه السبب؟

في كايرو 360 جمعنا لكم أكتر 5 حاجات سلبية ممكن نكون بنعملها وبتأثر على إنتاجنا من غير ما نحس. وبالتالي لازم نبطلها في أسرع وقت.

 

تعدد المهام

رغم اعتبار قدرة الشخص على إنجاز أكتر من عمل في نفس الوقت، مهارة إضافية. إلا إن بعض الدراسات أكدت إن تعدد المهام بيقلل مستوى الإنتاج بشكل كبير. لأن العقل مايقدرش يركز في أكتر من عمل بنفس الوقت. وبالتالي مش بندي كل مهمة التركيز والوقت الكافي.

فَتْح الموبايل أول ما نصحى من النوم

عقل الإنسان مايقدرش ينتقل من حالة النوم والاسترخاء لحالة اليقظة فجأة. والضوء الأزرق من الموبايل لما نفتحه أول ما نصحى بيخلي المخ يفرز الكورتيزول بكمية كبيرة (هرمون القلق)، وبيحطه في حالة مفاجأة من التوتر والضغط. وبالتالي بيقل الإنتاج. 

عدم الحفاظ على ميعاد نوم ثابت

قلة النوم وعدم انتظامه بيضعف قدرات زي الاستجابة، واتخاذ القرارت، وكمان التعلم. والمبالغة في قلة النوم لها نفس التأثير اللي ممكن تسببه نسبة 0.08% من الكحول في الدم.

عدم إلغاء الإشعارات

كل ما زادت قدرتك على التركيز، كل ما زادت المهام اللي تقدر تنجزها خلال اليوم. لكن مع وجود الإشعارات اللي بتيجي طول الوقت من الموبايل بتفقد قدر كبير من تركيزك. وبتسمح للعوامل الخارجية إنها تشتت انتباهك عن أي حاجة بتعملها.

شُرْب كافيين أكتر من المياه

طبعًا أغلبنا مايقدرش يستغنى عن الشاي أو القهوة، لكن على الأقل لازم نشرب كوبين مياه قصاد كل كوب من الكافيين خلال اليوم.

المشروبات دي بتسبب نسبة من الجفاف، وحتى نسبة بسيطة منه بيكون لها تأثير قوي على قدراتنا العقلية وإنتاجنا في العمل.

 

شاركونا برأيكم وقولوا لنا إيه من العادات اللي فوق بتعملوها؟؟