The Definitive Guide to Living in the Capital , Cairo , Egypt

كتب: عمر مسعد

كلنا أكيد سمعنا عن معرض الزهور اللي بيقام بشكل سنوي في حديقة الأورمان بالجيزة. وعرفنا إنه بدأ دورته الـ 82 يوم السبت 18 مارس الجاري، ومستمر لحد 3 مايو القادم. واللي نشاطه بيكون بشكل يومي من 9:00 صباحًا لـ 9:00 مساءً طوال فترة المعرض. وسعر تذكرة دخوله 2 جنيه لليوم الواحد.
ماسمعتش ولا عرفت ولا جالك خبر؟
مش مشكلة.. أدينا قلنا لك المعلومات الأساسية. وأي تفاصيل إضافية هتحتاج تعرفها علشان تاخد فكرة أكتر عن المعرض وفعالياته، ممكن تبص على المقال اللي كنا نشرناه قبل كده بخصوص الموضوع ده من هنا.

في مقالنا ده هنبعد عن التفاصيل التنظيمية والحكي اللي كنا حكيناه في المقال السابق. وهنلخص لك “روشتّة” سريعة كده فيها حبة نصايح عامة للزيارة، علشان تبقى ممتعة ومفيدة أكتر.. يللا بينا:

1- بلاش فلسفة

في المعرض بتتباع بذور وتقاوي لأشكال وألوان نباتات كتير. نصيحتنا لك بتقول إنه لو ماعندكش خلفية معرفية كويسة، فيما يخص زراعة النوع اللي أنت ناوي تشتري بذوره، يبقى بلاش تعمل كده. حتى لو البياع إداك محاضرة طويلة في سهولة الموضوع. لأن عن تجربة سابقة الموضوع بيفشل فشل ذريع. وبتبقى رميت فلوس ومجهود ووقت في الفاضي. جميل طبعًا إنك تبقى بتزرع بنفسك وبتتابع نمو الزرعة لحد ما تطرح. بس تبقى واخد في بالك إنه احتمال التجربة تفشل فماتزعلش. لكن لو حبيت تعمل ده، اتأكد من أنه عندك المعرفة والخبرة اللازمة علشان الموضوع يمشي بشكل كويس. أو شوف حد عنده خبرة يتابع معاك.

            
2- الجمال مش المعيار الوحيد

رايح معرض الزهور اللي مليان زهور وهشتري زهور. تفتكر ليه؟ .. علشان حلوة وجميلة طبعًا. أكيد ده المعيار الوحيد للاختيار والدافع الوحيد لنزولي المعرض أصلًا!
أيوة يا سيدي مقدرين حبك للجمال والله. بس خد بالك من نقطة تانية. أنه الجمال ده جمال حي وبيتأثر بالظروف وبيحتاج رعاية مش ديكور دايم. فممكن تضيف معيار تاني صغير، وهو: ظروفك. لما تيجي تشتري حط في اعتبارك ظروفك الشخصية وإمكانية اهتمامك بالحاجة اللي هتجيبها علشان تقدر تختار حاجة مناسبة. فلو مثلًا بتسافر كتير أو مش بتكون متواجد في بيتك طول الوقت يبقى بلاش تجيب حاجة من اللي بتحتاج رعاية مستمرة ومكثفة. وروح لحاجات تانية تكون أنسب، وهتلاقي فيها برضه أنواع وأشكال تاخدك، زي الصبَّارات مثلًا. وطبيعة الرعاية هتعرفها من البياع.

3- صور كتير

شد في إيدك كاميرا أو موبايل صورته كويسة وعيش يا معلم. ده أكتر مكان هتلاقي فيه كادرات حلوة ومناسبة، وخلفيات جذابة ومبهرة. خصوصًا للبورتريهات الشخصية. وهواة تصوير الطبيعة هيسحرهم المكان أكيد. حتى هواة التصميم والديكور ممكن يستلهمو أفكار حلوة جدًا ومطرقعة من التكوينات اللي بتبقى موجودة، بالذات في معارض اللاند سكيب هناك.

4- كسبان كسبان

التذكرة بكلام فاضي يعني مافيش أي تكلفة. فحتى لو أنت مش ناوي تشتري حاجة من جوة احرص على أنك تنزل تاخد جولة تتفرج وتملِّي عينيك بالجمال. وكمان تعدي على أصحاب المزارع والمشاتل وأماكن العرض، وتسألهم على الأنواع المختلفة وعن بيئاتها اللي بتنمو فيها، وعن طبيعة نموها ومراحله، وإيه اللي بيلزم له. وكل الأسئلة اللي في السكة دي. هتلاقي نفسك في الآخر طلعت بحصيلة ثقافة بصرية ومعرفية حلوة جدًا.

5- هادي حبايبك

يعني هو في أجمل من كده تهادي به ناسك وحبايبك مثلًا؟
خدلك لفة كده على الأركان المختلفة وهتلاقي حاجات مناسبة كتير. سواء من المستلزمات المنزلية، أو أدوات العناية بزروع الأواني والأحواض، أو معدات زراعة الحدائق، أو المنتجات الغذائية زي الأنواع المختلفة لعسل النحل، أو المخللات أو الفواكه الطازة أو التوابل ومكسبات الطعم الطبيعية، أو السوداني الأسواني والعسلية النوبي.. انبسط وابسط اللي حواليك.