The Definitive Guide to Living in the Capital , Cairo , Egypt

في الفترة الأخيرة بالرغم من أن البلطجة والسرقة وغيره من مظاهر العنف في المجتمع إلا أن الجمعيات والأعمال التطوعية الخيرية زادت بشكل أكبر وأصبح للشباب رغبة وحماس كبير للتطوع وتأدية عمل الخير زي مثلًا توصيل المياه أو بناء أسقف أو توصيل أدوية وملابس وغذاء، وطول ما في المصريين حب عمل الخير والتضامن الاجتماعي اللي موجود في الـ Software بتاعنا من غير ما نحتاج نتدرب عليه هـ تفضل مصرنا المحروسة بإذن الله محفوظة وأهلها في خير.

مصر فيها 27 محافظة وكل محافظة فيها ما بين 10: 20 قسم ومركز ودول اللي بـ يكونوا أكثر من 82 مليون نسمة، أكثر من النصف بحاجة بسيطة تحت خط الفقر اللي هو دخل 1 دولار في اليوم، الجمعيات الخيرية في مصر بـ تحاول على قد ما تقدر أنها تصل لكل المحتاجين وتوفر أقل متطلبات الحياة اليومية من أكل وشرب وعلاج والمتطوعين من كل الأعمار بـ يزيد في كل يوم عن الثاني لكن بـ نلاقي ناس بـ تقول أنا مش عارف أتطوع فين؟ الوقت مقفول ومش عارف إمتى الأنشطة..

من هنا جاءت فكرة موقع “خيرنا.كوم” لثلاثة شباب هم: محمد سالم وأميرة مصطفى وأحمد يحيي في 2010 في موقع الناس تقدر تدخل فيه بياناتهم زي المكان والوقت اللي يناسبهم والموقع هـ يرشح لهم إيه النشاط المناسب بناءً على البيانات الموجودة، مش كده وبس كمان الموقع هـ يرشح الأنشطة المناسبة على حسب الخبرات والإمكانيات، الموقع بالنسبة لمؤسسيه حلم تعبوا فيها ومازالوا بـ يفكروا في تطويره بأفكار جديدة ومبتكرة أكثر.

مجرد ما يكون عندكم حساب على موقع “خيرنا.كوم” هـ تقدروا تعرضوا كل الأنشطة والجمعيات الخيرية الموجودة في قاعدة البيانات وتختاروا العمل الخيري المناسب لكم بناءً على المكان القريب منكم أو أكثر وقت يناسبكم أو على حسب الموهبة اللي عندكم وتقدروا تفيدوا بها غيركم، أو على حسب المجال اللي حابين تقدموا فيه مساعدتكم زي رعاية الأيتام أو محو الأمية أو غيره من الأنشطة الخيرية، كمان تقدروا تختاروا على حسب نوع المساهمة اللي تحبوا تقدموها سواء كانت مادية أو عينية أو مجهود أو من البيت أو حتى تبرع بالدم كمان لو عندكم مؤسسة مفضلة لكم تقدروا تعرفوا إيه آخر الأنشطة للمؤسسة دي ولو فيه منطقة معينة محتاجة عمل خير تقدروا تضعوا فكرتكم على الموقع وتطلبوا من الأعضاء المساعدة.

كل التقسيمات والاختيارات دي تقدروا تعرضوها من خلال أكثر من طريقة، الأولى عن طريق أنك تبحث من خلال الجمعيات والأنشطة في خانة البحث أو تضغط على رابط الجمعيات اللي موجود عليه كل الجمعيات الخيرية على مستوى مصر بمبادراتها ونشاطاتها أو عن طريق خريطة بـ تعرض لكم مصر كلها وتقدروا تظهروا عليها اللي أنتم عاوزينه من مبادرات أو أماكن الجمعيات من رفح للسلوم ومن إسكندرية لحلايب وشلاتين، كمان فيه اختيار ساهم وده بمجرد الضغط عليه هـ تظهر لكم كل المبادرات والأنشطة اللي بـ تقدمها كل الجمعيات الخيرية المُسجلة على قاعدة البيانات ولما بـ تشتركوا في أي نشاط بـ يُضاف نقاط على حسابكم ويبقى فيه تنافس بينكم وبين أصحابكم ولكن في مجال الخير، مدونة خيرنا ودي هـ تلاقوا عليها مجموعة من الموضوعات والمقالات اللي تخص التطوع وأنشطة التطوع ومعلومات عن فوائد أنشطة التطوع.

الموقع بالفعل رائع وهـ يوفر عليك جهد ووقت كبير في البحث عن الأنشطة التطوعية في منطقتك أو أحدث نشاط لجمعيتك المفضلة أو أنك إزاي تقدر تتبرع لأفعال الخير، وتقدر تتابع صفحة الموقع على الفيسبوك وتويتر علشان تعرفوا كل جديد عنهم.