The Definitive Guide to Living in the Capital , Cairo , Egypt

خيم رمضان ولياليها من أهم العلامات اللي بنشوفها في الشهر الكريم، وبيكون أساسها الألفة والمحبة والتجمعات المفرحة، مش مجرد حفلة وتنورة وأكل وشرب، ده كمان ليالي رمضان في الخيم بتبقى فيها روح مختلفة بتخلينا مبسوطين وكلنا بهجة. إحنا جربنا خيمة “ليالي غرناطة” في مصر الجديدة، والتجربة كانت مبهجة بالنسبة لنا. في السطور الجاية هنقول لكم على كل التفاصيل اللي محتاجين تعرفوها عن المكان.

ليالي غرناطة موجودة جوا قصر غرناطة بمصر الجديدة، وهو مكان تاريخي له أكتر من 100 سنة، ومن أهم المعالم في مصر الجديدة، ومن أول ما تدخلوا هتنبهروا بالديكور والتفاصيل، بداية من ممر تأكيد الحجز لحد ما توصلوا للترابيزة بتاعتكم. المكان فيه مستويين للقعدة؛ أنتريتهات فخمة وواسعة، أو كراسي عالية، وعندهم فريق عمل كبير جدًا، ومحترفين بس عندهم بطء في الخدمة ويمكن يكون السبب كثرة عدد الناس.

من حظنا، لقينا حفلة في اليوم اللي رحنا فيه، كان نجمها هو محمد عدوية، وكمان كان فيه تنورة، ده غير الدي جي اللي كان بيشغل أغاني مختلفة، والمكان كان زحمة وكله أجواء أسرية جميلة انبسطنا منها، والأهم من كل ده أنكم بتبقوا على طبيعتكم وبتفرحوا وسط الأهل والأحباب.

المكان بيكون بنظام الحجز المسبق من خلال صفحتهم على فيسبوك أو انستجرام، وكل ويك إند فيه حفللات مختلفة، والحجز بيكون أيام الويك إند بيبدأ من 500 جنيه بيشمل حضور الحفلة والسحور “فول – طعمية – بطاطس – أومليت – جبنة قريش – جبنة بالقوطة – سلطات – سجق – فطير مشلتت – عسل أبيض وأسود”، والأكل كان لطيف رغم أنه ماكنش سخن، ويمكن تأثير الجو أثر على كده، وكمان السجق ماعجبناش وده بردوا بسبب أنه كان بارد والصلصة بتاعته ماكنش ينفع تبقى باردة!

أما باقي الاسبوع من الأحد للأربعاء فتقدروا تروحوا المكان بدون تيكت وبيكون فيه دي جي عامل جو لطيف، وكمان عندهم ألعاب كتير زي الطاولة والضمنة والهوكي وبينج بونج وبلياردوا وغيرهم.

خلصنا السحور بتاعتنا وقبل ما نخرج قررنا نتصور في الأماكن اللي عاملينها للتصوير وهي مميزة وهتنبسطوا منها.

تقدروا تعرفوا اكتر عن خيمة ليالي غرناطة من خلال صفحتهم على فيسبوك من هنا.