أجمد 5 Smart Phones في كايرو!
Mohamed Hamdy
مع انتشار وسائل التعبير والتواصل وبرامج السوشيال ميديا، أصبح اقتناء Smart Phone مش مجرد رفاهية على الإطلاق. ومع انتشار وتنوع أنواع السمارت فونز والإختلافات الكبيرة بين أنواعها وإمكانياتها.. بنقدم لكم فى كايرو360 عرض بأجمد 5 smart phones في مصر، مع توضيح إمكانيات كل تليفون وسعره التقريبي…. ما تشتريش قبل ما تقرأ الموضوع ده!
أيفون 7
فى رأينا هو الموبايل الأقوى في مصر حاليًا، وممكن نقول إنه الأفضل والأقوى على مستوى العالم كمان.
أيفون 7 هو أحدث إصدار من سلسلة هواتف Apple الذكية. بيتباع في إصدارين أساسيين الأول باسم أيفون 7 والثاني أيفون 7 بلس، واللي بييجي بحجم شاشة أكبر وكاميرا إضافية في الخلف لتقوية قدرة الجهاز على التقاط الصور والفيديوهات.
أي تليفون من الإتنين سعته التخزينية إما 32 أو 128 أو 256 جيجا بايت. ومن المعروف أن السعة التخزينية لأجهزة أبل غير قابلة للزيادة لإن الجهاز مش بيقبل إضافة Memory Card عكس باقي الأجهزة اللى بتطلقها شركات تانية.
من أفضل الإمكانيات في أيفون 7 و 7 بلس الكاميرا المتميزة بدقة 12 ميجا بكسل للكاميرا الخلفية و 7 ميجا بكسل للكاميرا الأمامية. أما الرامات الخاصة بالجهاز فهي بسعة 2 جيجا بايت و3 جيجا بايت في حالة أيفون 7 بلس.
حجم شاشة ايفون 7 هو 4.7 إنش، أما 7 بلس حجم شاشته 5.5 وعلى الرغم من الفرق الصغير بين الرقمين إلا أن الفرق في حجم التليفونين يستحق التفكير أكتر من مرة قبل الشراء.
كل تليفونات أبل الجديدة بتيجي فيها سيستم10 IOS اللي بنعتبره واحد من أفضل برامج إدارة الهواتف الذكية في العالم، خاصة إنه غير قابل للإختراق أو التهنيج أو باقي المشاكل اللى بتواجه مستخدمين التليفونات التانية.
بعد ما استعرضنا إمكانيات تليفون أبل الجديد لازم نتكلم في حاجة مش بنحب نجيب سيرتها فيما يتعلق بأبل: السعر… الحقيقة إن هواتف أبل هي الأغلي تقريبًا في السوق المصري، وبيتراوح سعرها من حوالي 12 ألف الى 18 ألف جنيه، على حسب موديل التليفون والمكان اللي بتشتري منه وسعته التخزينية، وطبعًا ساهم في زيادة سعر الموبايل كمان ارتفاع سعر صرف الدولار في الفترة الأخيرة… غالي شويتين… لكن الغالي تمنه فيه.
سامسونج جالاكسي S8
المنافس الأقوى لشركة أبل هي بالتأكيد شركة سامسونج.. واللي على الرغم من خروجها بمشكلة كبيرة مع أحدث منتجاتها (جالاكسى S8) و (جالاكسي S8+) واللي طرحته الشركة بسرعة بعد الفضيحة الضخمة للطراز السابق واللي تعرضت بعض الهواتف منه للإحتراق مع المستخدمين، إلا أن الشركة العملاقة لسه قادرة على المنافسة بقوة على ريادة السوق.
أجهزة سامسونج بتعتمد على نظام أندرويد مفتوح المصدر، واللي يعتبر واحد من أقوي وأهم أنظمة إدارة الهواتف الذكية.. وفي إصدارها الأحداث S8 بتقدم لنا إصدارين أساسيين هم S8 و S8 + واللى بييجي بشاشة لها أطراف منحنية لتقديم تقنية مشاهدة وتعامل أفضل مع الشاشة.
5.8 انش هو حجم الـ S8 و 6.2هو حجم الـS+ لكن الجهازين بييجوا بكاميرا واحدة خلفية قوتها 12 ميجا بكسل، وأمامية بقوة 8 ميجا بكسل ورامات 4 جيجا بايت.
سعة بطارية S8 هى 3000 MAH أما S8+ بطاريته سعتها 3500 MAH يعني هتدوم لوقت أطول بس مش بكتير قوي عن الـS8
نيجي للسعر… السعر بيتراوح بين 12 ألف إلى 16 ألف حسب الموديل والسعة التخزينية اللي بتختلف مابين 32 جيجا بايت أو 64 جيجا واللي بينفع تزيد باستخدام كروت الذاكرة إلى 256 جيجا بايت.
SONY
بعيداً عن الأسعار العالية لأبل وسامسونج، بتقدم سوني مجموعة من الهواتف الذكية المتميزة في شكلها وإمكانياتها المتناسبة مع سعرها.. اخترنا لكم منها الإصدار الأحداث Sony Xperia XA1 واللي بيتمتع بشكل خارجي وتصميم أنيق.
بحجم شاشة 5 إنش وبطارية بسعة 2300 mah ورامات 3 جيجا بايت بييجي الهاتف الجديد من سوني، واللي على عكس العادة بتنتجه الشركة بحيث يكون غير مضاد للماء ولكنه بيعمل بنظام Google Android™ Nالشهير لإدارة الهواتف الذكية.
كاميرا تليفون سوني الجديد 23 ميجا بكسل وده رقم ضخم ومش موجود في كتير من التليفونات الموجودة حاليًا في السوق، أما الكاميرا الأمامية 8 ميجا بكسل، وبكده تكون سوني بتقدم تليفون متميز جدًا فيما يتعلق بالكاميرا. لكنه مش مبهر فيما يتعلق بسرعة الأداء.
على الرغم من عدم انتشار منتجات سوني بين المستخدمين في مصر بشكل كبير إلا أن اللى بيحبوا منتجاتها وبيتعودوا عليها مش بيقدروا يسيبوها بشكل سريع وينتقلوا لمنتجات تانية. علشان تليفونات سوني من الأجهزة اللى بتدي امكانيات كويسة لمستخدميها مقابل سعر جيد.
فيما يتعلق بالسعر.. التليفون الجديد من سوني بحوالى 7000 جنيه لكن مافيش عندنا تأكيدات نهائية بخصوص السعر لحد دلوقت.
HTC
من الشركات اللي قدرت تحقق سمعة وإسم جيدين جداً في الأسواق العالمية وخاصة الأسواق المصرية، وعملائها بيتمتعوا بمستوي عالي جدًا من الولاء للشركة ومنتجاتها وحبهم لها، خاصة وأن التليفونات بتتمتع بشكل متميز وتصميم قوي وسعر مناسب في نفس الوقت.
اختارنا لكم HTC U Ultra اللي بييجي بكاميرا خلفية 12 ميجا بكسل وأمامية 16 ميجا بكسل وده اللي بيخليها واحدة من أقوى الكاميرات اللي رأيناها مؤخرًا في الأسواق، ورامات 4 جيجا بايت وشاشة 5.7 بوصة بتصميم متميز ومتين جدًا وشيك لدرجة كبيرة.
بنلاحظ إن تليفون HTC U Ultra مش متميز بدرجة كبيرة فيما يتعلق بالإمكانيات، لكنه متميز فيما يتعلق بالتصميم والشكل وحجم الشاشة، كمان صوت الجهاز ممتاز جدًا في تشغيل السماعات الخارجية Speakers لو كنتم من محبي تشغيل الموسيقى وسماعها في كل مكان.
سعر HTC U Ultra حوالي 10 ألاف جنيه وممكن يكون سعره مرتفع مقارنة بباقي الأجهزة، لكن زي ما قولنا سعره بيضاهيه تصميم متميز وإمكانيات مناسبة.
HUAWEI
بتدور على تليفون بإمكانيات ممتازة وسعر قليل؟ HUAWEI بيمثل كلمة السر في المعادلة دي.. علشان كده اختارنا لكم هواوي نيكسس 6P واللي سعره حوالى 11000 جنيه على الرغم من مواصفاته المتميزة اللى لو دورنا على شبيهها في موديلات تانية هيكون السعر أزيد من كده بكتير جدًا.
HUAWEI بييجي بسعة تخزين 64 جيجا بايت وشريحتين اتصال و3 جيجا بايت رامات وشاشة 5.7 إنش بكفاءة HD وده يخليه واحد من أقوى شاشات الهواتف الذكية اللي شوفناها بالسعر ده.. كمان التصميم الخارجي للتليفون متميز جدًا، وأداؤه الداخلي عالي قوي لعمله بنظام أندرويد الشهير.
الكاميرا الخلفية للتليفون 12.3 ميجا بكسل والأمامية 8 ميجا بكسل وده بيخلي إمكانياته في التصوير متواضعة شوية خاصة في صور السيلفي، لكن سعر الجهاز مقارنة بمواصفاته بتخليه دايمًا صفقة رابحة للناس اللي بتدور على السعر الأرخص بدون ما تخسر كتير في المواصفات.
عالم السمارت فونز بيتغير كل يوم… وكل واحد له رأي ممكن يكون متفق أو مختلف معانا فيه.. عاوزين نشوف في التعليقات أنواع تليفوناتكم وأسعارها، وهل تنصحوا باقي المستخدمين بيها أم لا؟
مقترح
معالم وسياحة
أبرزها "القاهرة التاريخية".. 7 مواقع مصرية على قوائم التراث العالمي
آثار مصرية اليوم العالمي للتراث +1
معالم وسياحة
