The Definitive Guide to Living in the Capital , Cairo , Egypt

تسوق

اعرف ميعاد إصدار لعبة PUBG لجهاز PS4

PlayerUnknown's Battlegrounds PS4 PUBG ألعاب ألعاب قتال إدمان ألعاب إكس بوكس بلاي ستيشن
اعرف ميعاد إصدار لعبة PUBG لجهاز PS4
بواسطة
Mohamed Hamdy

عشاق ألعاب القتال واللي بيشترك فيها مجموعة كبيرة من اللاعبين. عارفين كويس لعبة PUBG أو PlayerUnknown’s Battlegrounds واللي بتعتبر اللعبة الأشهر والأكثر انتشارًا على مستوى العالم.

اللعبة عبارة عن شخص مجهول بيتم إلقائه من طيارة، وبيبدأ يجمع أسلحة ومعدات من البيئة اللي حواليه. وبعدها بيدخل في مطاردات واشتباكات مع لاعبين تانيين. وفي النهاية بيتبقى لاعب واحد هو اللي بيفوز ويحقق النصر.

وعلى الرغم من بساطة فكرة اللعبة إلا أنها نجحت في جذب الملايين علشان يلعبوها بشكل (إدماني). وفي بعض الأحيان أدت اللعبة لخلافات عائلية كبيرة أو حتى حالات طلاق بسبب الإنشغال بلعبها لوقت طويل!

لكن محبي PUBG كان عندهم مشكلة. وهي العقد الحصري بين اللعبة وبين شركة مايكروسوفت صاحبة جهاز Xbox الشهير في عالم الألعاب. الأمر اللي كان بيخلي محبي اللعبة مش عارفين يلعبوها غير على أجهزة إكس بوكس. أو أجهزة الكمبيوتر الشخصية.

لكن الكلام ده أصبح من الماضي، بعد إعلان بلاي ستيشن عن تقديم اللعبة على منصاتها وأجهزتها، وأهمها جهاز بلاي ستيشن 4 اللي يعتبر من أشهر أجهزة الألعاب في العالم. والخبر أثار حالة من الفرح بين مستخدمين السوشيال ميديا واللي كانت الطريقة الوحيدة علشان يلعبوا بيها PUBG بعيدًا عن إكس بوكس هي اللعب من خلال الموبايل. وطبعًا تجربة اللعب على الموبايل أقل استمتاعًا من اللعب على جهاز متخصص في الألعاب.

بلاي ستيشن أعلنت أن اللعبة هتكون متوفرة على منصتها في 7 ديسمبر الجاي. لكنها أعلنت عن فتح باب الحجز المسبق للعبة. وقدمت اللعبة في 3 إصدارات:

الإصدار الأساسي بيحتوي على اللعبة فقط بدون أي إضافات مقابل حوالي 30 دولار.

إصدار Survivor بييجي معاه إضافات في اللعبة تسهل اللعب مقابل حوالي 50 دولار.

إصدار Champion وده الأغلي. وبييجي معاه إضافات أكتر بكتير مقابل حوالي 60 دولار.

لكن الأسعار دي أسعار مخفضة أعلنت عنها بلاي ستيشن علشان تشجع الناس على شراء اللعبة. ومن المتوقع أن الأسعار تزيد مع الإصدار الفعلي وإقبال الناس عليها.

اللعبة كمان بتحتاج اتصال دائم وقوي بالإنترنت، واشتراك في باقة PS Plus واللي بتتيح اللعب أونلاين مع لاعبين أخرين باشتراك شهري أو سنوي أو ربع سنوي حسب اختيار المستخدمين.

محبي لعبة PUBG واللي لعبوها لوقت طويل على الموبايل.. ياريت يقولوا لنا استقبلوا الخبر ازاي؟ وهايعملوا ايه لما هيلعبوها على بلاي ستيشن؟ والناس اللي أول مرة تسمع عن اللعبة… هل جاء الوقت أنكم تجربوا أدائكم مع لعبة جديدة ومختلفة وليها شهرة عالمية؟

مقترح