The Definitive Guide to Living in the Capital , Cairo , Egypt

كتير مننا من عشاق الكتب، وعندهم شغف لشراء كل جديد من الكتب، وبما أن اليومين دول النزول والاختلاط بنخففهم لأقصى درجة، فإحنا في كايرو 360 بننصح كل محبي الكتب أنهم يشتروها أونلاين، ولكن لو مصممين تنزلوا تشتروا الكتب من المكتبات، فهنقول لكم على 7 نصائح وقائية مهمة عند شراء الكتب.

1- وأنتم داخلين أي مكتبة لو فيها باب افتحوه بمنديل ورق، وأول ما تدخلوا ارموه في كيس منفصل، وكمان اعملوا نفس الأمر وأنتم خارجين.

2- ماتدخلوش المكتبة إلا وأنتم لابسين الكمامة، وتتأكدوا أن البائع في المكتبة لابس كمامة وجوانتي، وغير كده تحاولوا على قدر الإمكان ماتتعاملوش معاه او تقربوا منه وساعدوا نفسكم بنفسكم.

3- يفضل تكونوا عارفين طلبكم كويس، علشان ماتلمسوش كل الكتب في المكتبة وتقلبوا فيها، خلوا بحثكم ضيق ومحدد، لو عارفين طلبكم اطلبوه مباشرة من البائع من غير لمس أي كتب معروضة.

4- لما تمسكوا كتب لازم تكونوا لابسين جوانتي، اللي هو للاستخدام مرة واحدة، وفور انتهائكم من البحث عن الكتب بتقطعوه وترموه في كيس، وتغيروه وتلبسوا واحد تاني عند الحساب والتغليف.

5- قبل تغليف البائع للكتب اللي هتشتروها، لازم تعقموها من خلال الكحول، وده كإجراء وقائي لأنكم مش ضامنين مين اللي مسكها قبلكم وبتعقموا الغلاف الخارجي فقط.

6- وأنتم خارجين من المكتبة بتجمعوا كل مستلزمات الوقاية الخاصة بيكم، زي الكمامات والجونتيات، في كيس مهملات وتقفلوه كويس وترموه في أقرب سلة علشان لما حد ييجي يشيلوه ياخد باله إن الكيس ممكن يكون خطر.

7- قبل ما تقرأوا الكتب يفضل إنكم تسيبوها في الهواء شوية علشان لو فيه أي فيروسات أو ميكروبات تموت بعامل الهواء والشمس.

وزي ما قلنا لكم إحنا بنشجعكم على الشراء أونلاين، مع الاحتفاظ باجراءات الوقاية المهمة جدًا مع كل عملية شراء مهما كانت نوعها.