The Definitive Guide to Living in the Capital , Cairo , Egypt

محل رقم 42s في الدور الثاني من مول الداون تاون في أول شارع التسعين بالتجمع الخامس، ده محل متخصص في أحذية الأطفال والأحذية الطبية ودعامات الأقدام اسمه «بيللينو – Bellino» وده مش فرعه الوحيد لكن له فرع ثاني في ميدان صلاح الدين في مصر الجديدة.
محل صغير جدًا مربع الشكل كل الجدران معلق عليها أحذية بكل الألوان والأحجام من الأرض للسقف. متخصص في المقاسات الصغيرة، يعني من أول عمر 3 شهور لحد مقاس 36 اللي غالبًا هـ تلاقيه للأطفال أو للسيدات اللي مقاس أقدامهم صغيرة. والتخصص الدقيق الثاني هو تقديم أحذية طبية أشبه بموديلات وألوان تشبه «كروكس» كثير لكن بأسعار أقل، والفكرة هنا أنك قبل ما بـ تشتري الحذاء الأمثل الصحي بالنسبة لك بـ تعمل كشف طبي عند طبيب متخصص تابع للمحل علشان يحدد لك أنسب فرشة أو نعل لقدمك، زي كشف النظارة كده، واللي فهمناه أنك بـ تستلم حذائك فورًا والكشف بـ يكون مجانًا طبعًا. الأسعار للمقاسات الكبيرة من 150 لحد 300 جنيه حسب الموديل والدعامة اللي متركبة فيه، وبما أننا في الشتاء فكل الموديلات المعروضة كانت بووتات وهاف بووت وخامات من الشامواه والجلد المقلوب. والغالب على المعروض الموديلات الحريمي أو البناتي.
فيه رف في الواجهة أول ما تدخل المحل تقريبًا ده أكثر حاجة شدتنا وهو رف مخصص للمقاسات الصغيرة جدًا أو للمواليد، والمقاسات غير الطبيعية اللي شوفناها وتحرك مشاعر الأمومة والأبوة بسهولة عند أي حد، أسعار كويسة جدًا بـ 25 و35 ولحد 50 جنيه، مش بس شوز عادي، فيه كوتشي ولكلوك والأحذية بالدعامات الطبية اللي قولنا عليها. لكن اللكلوك اللي على أشكال حيوانات كانت دمها خفيف وفيه منها كل المقاسات ماعدا الرجالي الكبير. والأسعار كويسة جدًا، والخامات كمان، وعرفنا أن معظم المعروضات من مصانع «بيللينو» الخاصة وفيه عدد من المعروضات المستوردة، والمعروضات اللي عليها تيكيت أصفر خاصة الموديلات اللي لها وظائف صحية لعلاج وتصحيح وضع القدم.
أحذية وشباشب وصنادل وبس، مافيش إكسسوارات ولا شنط، لكن فيه عدد من الدعامات الطبية والفرشات من ماركة Aetrex لعلاج الـ Flat Feet وآلام الكعب والأصابع وللحوامل، وغيره بـ تُباع بشكل منفرد، بس برضه يستحسن تأخذها تحت إشراف طبيب. الموديلات المعروضة كلها فيها ميزة أنها خفيفة الوزن جدًا.
زيارة لواحد من فروع «بيللينو» ممكن يغير مفهومك عن الأحذية وأولويات شراؤها. الشياكة والموضة مش هـ تبقى من أول اهتماماتك، وهـ يحل مكانها الراحة والوضع الصحي لقدمك خاصة لو كان عندك آلام معينة أو بـ تمشي كثير خلال يومك، الخدمة ودودة وجيدة جدًا والمكان جدير بالزيارة.