The Definitive Guide to Living in the Capital , Cairo , Egypt

هدوم مريحة، بتراعي شكل الجسم المصري، وحط تحت الجسم المصري دي 13 خط، وفي نفس الوقت يكون خامتها محترمة، تلات شروط شبه مستحيل تتوفر في قطعة واحدة، حسب خبرتنا في شراء الهدوم.

لف كتير على المحلات ومحاولات مضنية كانت بتروح عالأرض، لو المقاس موجود اللون لأ، ولو اللون تمام  الخامة وحشة، ولو كله حلو تلاقي السعر مرعب !، الأمور فضلت كدا لحد ما عرفنا “خطوة”، في الأول سمعنا عنه من بعض الأصدقاء وإزاي هو من الأماكن اللي بتبيع من خلال الإنترنت، ومضمونة في نفس الوقت، كنا على وشك نجربه أون لاين لأن فرعه الأساسي في المقطم، لكن عرفنا إنه فتح فرع جديد في الدقي، في شارع مصدق، فقررنا نزوره وانبسطنا جدًا من الزيارة.

خطوة في الأساس براند شبابي، يعني محدد هدفه سواء كانوا الشباب دول ذكور أو إناث، يعني مافيش أطفال ومافيش حاجات للناس الكبيرة في السن، الشباب بس هم اللي هايلاقوا الحاجات اللي محتاجينها هنا.

في قاعدة في عالم التسويق بتقول إن الاختيارات الكتير مش حاجة كويسة وإن كل ما قلت الاختيارات زادت فرصة الشراء، مش عارفين إذا كان فريق خطوة عارفين الحكاية دي وهم بيأسسوا المكان أو لأ، لكن الاختيارات القليلة والموديلات المحددة والواضحة، حتى طريقة عرض الهدوم، بتشيل من على كتفك هم الحيرة، الاختيار سهل وسريع وأنت واقف بتشوف كل الموديلات بوضوح،المكان مريح وواسع والتسوق بيتم بسرعة جدًا، الاختيار في مدة أقصاها خمس دقايق، بدون الحاجة بقى لقلب الاستاندات والبحث الدقيق وسط الموديلات الكتير جدًا اللي بتدمر إمكانية الاختيار.

أعظم حاجة في خطوة هي الخامة، قطن100%، ودي عملة نادرة، ناهيك عن طريقة التفصيل، خصوصًا الملابس الحريمي، اللي مناسبة جدا لشكل الجسم المصري، نيجي بقى للموديلات، ودي ممكن تكون نقطة خلاف، ناس هاتشوف خطوة عظيم جدًا وناس هتشوفه وحش جدًا، لكن في رأينا خطوة هو أنسب مكان تروحه علشان تجيب القطع الأساسية في لبسك، وكمان الألوان الأساسية للشغل، تي شيرتات، بناطيل كاجوال، فساتين كلاسيك، جواكت، من كل أيتم هتحتاجه، هتلاقي ابتكار أو اتنين من خطوة، أما الأسعار فالتي شيرت الحريمي البيزك بـ 80 جنيه وفي السيل بيوصل 70، أيوة الأرقام حقيقية، بكم وطويل للمحجبات وفي بنص بسعر أقل، الأسعار بتبدأ من 50 وبتوصل لـ 600 أحيانا لو فستان خامته عبقرية.

طيب فين العيب؟؟ العيب إنه زي أي مشروع جديد بادئ بيكون في حاجات خارجة عن السيطرة، اللي شوفناه في خطوة، وضايقنا شوية إن القطع مش كلها نفس التفصيل، أحيانًا بيكون فيه عيوب تفصيل ليها علاقة بالمصنع نفسه، لذلك بننصح الناس اللي بتشتري تقيس وتراجع حتى لو هاتاخد مقاس مختلف من نفس القطعة، لأنه في اللبس ممكن يختلف والموضوع ده بيبان جدًا في الفساتين، وبيقل جدًا في باقي القطع.

في النهاية نجب نقول لكم خطوة اختيار لطيف للناس اللي مش بتحب تفكر كتير والعمليين اللي ماعندهمش وقت للشوبينج، عليكم وعلى خطوة.

أحسن حاجة في خطوة طبعًا هي  الخامة بتاعتهم والجودة والسعر المعقول، لكن برضه  ماعندهمش اختيارات كتيير للموديلات وساعات بيكون فيه فروق في التفصيل من قطعة للتانية. لكن الأكيد أنكم لو ناس ماعندهاش وقت للتسوق هتتبسطوا قوي هناك وتوفروا وقت كتيير خاصة أنهم بيوصلوا لأي مكان. وتقدروا تشوفوا صفحتهم وعنوانهم هنا.