The Definitive Guide to Living in the Capital , Cairo , Egypt

تسوق

سبع نصائح مهمة لو ناوي تشتري عربية مستعملة

استهلاك البنزين الميزانية سوق العربيات عربيات مستعملة قطع الغيار
سبع نصائح مهمة لو ناوي تشتري عربية مستعملة
بواسطة
Omar Abd-elmaqsoud

نظراً إلى إن وجود العربية في حياتنا مابقاش من الكماليات ولا من الرفاهيات اللي ممكن نستغنى عنها، فأكيد كلنا مرينا بمراحل مختلفة في عملية شراء عربية، ومؤكد إن كلنا مرينا على مرحلة شراء عربية “مستعملة” على قد ظروفنا، لحد ما تتحسن ونعملها أبديت.

في الحقيقة إنك تشتري عربية مستعملة دي مرحلة حتمية، لازم تمر بيها، لإن ببساطة “الميزانية” هتلعب دور كبير أوي في اختيارك،  لكن لو معاك فلوس تجيب عربية جديدة، فالعربيةالمستعملة ممكن تكون خيارك الأول برده، وده لأسباب كتير الحقيقة، منها إنك هتتعلم عليها وتجرب فيها، وبما إن خطوة شراء العربية المستعملة بقت خطوة هتتاخد هتتاخد، تعالى نقولك كلمتين في سرك، تحطهم حلقة في ودنك وأنت بتاخد الخطوة دي:

أولًا: زي ما قولنالك قبل كده، “الميزانية” ثم “الميزانية” ثم “الميزانية”، حدد ميزانيتك قبل ما تشتري علشان تختصر وقت وحيرة ومجهود كبير.

ثانيًا: ركز كويس في نوع العربية اللي عجبتك من حيث قدرة الماتور بتاعها ومعدل استهلاكها للبنزين، وتوفر قطع غيارها وأسعارها.

والخطوتين دول هيخلوا تصورك واختيارك للعربية اللي عايز تشتريها أو بتدور عليها أوضح، وبالتالي ممكن تبدأ تدور في الخيارات المتاحة قدامك على الأفضل.

ثالثًا: خد معاك حد بيفهم، ومهم جدًا يكون خبرة، لأن خبرتك عمرها ما هتكون زي خبرته، حتى لو كنت ركيب عربيات قديم، وده لإن مش شرط يكون نوع العربية اللي هتشتريه مر عليك قبل كده وعارف عيوبه، لكن أكيد هيكون عدى كتير على اللي دي شغلانته، ده غير ألاعيب التجار اللي في الأغلب إحنا ما نعرفش عنها كتير.

رابعًا: قبل ما تدفع فلوس، وأنت بتحدد ميزانيتك، اعرف سعر العربية اللي أنت عايز تشتريها في السوق، عند تجار وعند ناس عادية بتبيعها.

خامسًا: جرب العربية بنفسك حتى لو معاك فني أو خبير، علشان تتأكد من إنها مناسبة ليك بشكل كامل.

سادسًا: اشتري عربية ليها شعبية في السوق، علشان ما تتعبش لو في حالة حبيت تغيرها أو تبيعها.

سابعًا: لو فعلًا اخترت واشتريت عربية وكنت عارف إن فيها مشكلة في بعض الأجزاء، صلحها فورًا علشان الموضوع مايوسعش منك، واهتم دايمًا بالصيانة الدورية.

نتمنى لكم التوفيق في اختيار أحلى عربية مستعملة!

مقترح