The Definitive Guide to Living in the Capital , Cairo , Egypt

النهارده هنعرفكم على فنانة مصرية موهوبة قررت احتراف فن “الأميجورومي” وتحويله لمشروع فني تحقق منه نجاحها في الحياة، وهي ميرفت رجب، اللي بدأت مشروعها لتصنيع العرائس من أكتر من 7 سنوات، وده بعد ما اتعرفت على فن “الأميجورومي”، وهو فن ياباني لصناعه العرائس الكروشيه المحشوة.

بتقول “ميرفت” إنها لما اتعرفت على فن “الأميجورومي”، حست بحب كبير ناحيته وقررت التعرف عليه أكتر، وحست إن صناعة عرائس عن طريقه هو تحدي حقيقي لازم تنجح فيه.

 

في بداية رحلتها استخدمت “ميرفت” باترونات من الصين لقيتها في مجلات مصورة موجودة على الإنترنت، وبعدها اكتشفت إن فيه فيديوهات على اليوتيوب، لكن بعد كدة بدأت تصمم العرائس اللي بتصنعها بنفسها.

وبتكمل “ميرفت” إن زوجها شجعها إنها تنفذ عرائس وتهادي بيها الأهل والأصدقاء، وبعدها لقت تشجيع كبير من كل المقربين منها، فقررت تبدأ مشروعها وتبيع المنتجات اللي بتصنعها.

كل عروسة بتعملها “ميرفت” بتاخد منها حوالي ١٠ أيام عمل كمتوسط، وممكن المدة توصل لأسبوعين، علي حسب تفاصيلها، وبتستخدم في التنفيذ خيوط من خامات مختلفة، زي القطن والأكريلك والصوف، والحشو بيكون فيبر، لكن أكثر خامة بتحبها هي خيوط القطن لأنه بيكون سهل في الشغل وبيدي نتائج جميلة بحسب تعبيرها.

ميرفت بتبيع العرائس عن طريق معارض بتشارك فيها وكمان عن طريق صفحتها على فيسبوك.

 

تقدروا تتعرفوا أكتر على عرائس ميرفت رجب، من خلال زيارة صفحتها علي الفيسبوك.