Mohamed Talaat
القاهرة محافظة عظيمة، فيها آثار مهمة، وأماكن تاريخية، وفنادق من أقدم فنادق العالم، وفيها كمان محلات تاريخية، في السطور الجاية هنكلمكم على 3 من أقدم المحلات في القاهرة.. ودول مجرد نماذج من محلات تاريخية مالية العاصمة.
حراز
عطارة حراز اتأسست في منطقة الغورية وبالتحديد”تحت الربع” وراء مديرية الأمن، سنة 1885، وبمجرد دخولكم المحل مش هتحسوا أبدًا أنكم في القرن الـ21، ورغم إن المحل جدد الواجهة طبقًا لمتطلبات العصر، إلا انه لسه محافظ على تاريخه وأدراجه وأرففه اللي اتبنى عليها، حتى الديكور والأبواب موجودين زي ما هما، كمان لسه الشوالات بتاعة العطارة موجودة زي ماهي طول الوقت من بداية افتتاح المحل.
بابازيان
يعتبر من أقدم محلات الساعات في مصر، واتأسس سنة 1903، واللي أسسه فرنسيس بابازيان اللي وصل مصر بعد نجاته من مذابح الأرمن في الوقت ده، وفتح المحل في قلب منطقة العتبة، واشتهر ببيع وإصلاح وتجديد الساعات، ومازال المحل موجود وبيبع الساعات القديمة جدًا “التحف” واللي هي بطبعها غالية جدًا، وزبائنه كلهم من الطبقة الغنية، ومازال محتفظ برونقه القديم، وبيديره حاليًا أشود بابازيان الحفيد.
بايوكي
تصوير: ميشيل حنا
وسط باب خشب أسود مطعم بماء الذهب ولافتة مكتوب عليها اسم المحل في شارع عبد الخالق ثروت بمنطقة وسط البلد موجود جواهرجي قديم معروف باسم “الخواجة بايوكي”، واتأسس سنة 1900، وهو امتداد لمجموعة محلات إيطالية اتأسست من قبل ما يفتحوا فرع مصر، والمحل ده بالتحديد له شهرة عالمية خاصة بعد دخولهم موسوعة جينيس للأرقام القياسية بسبب احتفاظهم بأكبر خزنة حديد على نفس طرازها القديم مساحتها متر في متر وعمقها 2 متر، وبابها من الحديد بسمك 3 سم، وصنعت في إيطاليا واتنقلت لمصر.
اللي أسس المحل والمجموعة كاملة الجد الأكبر باولو بايوكي، والآن بيديره الحفيد الأخير راؤول.
مقترح
معالم وسياحة
أبرزها "القاهرة التاريخية".. 7 مواقع مصرية على قوائم التراث العالمي
آثار مصرية اليوم العالمي للتراث +1
معالم وسياحة
