The Definitive Guide to Living in the Capital , Cairo , Egypt

قصص النجاح في العاصمة مالهاش عدد، وكتير منها ملهم وبيدي أمل، والنهارده قصتنا أبطالها 3 شباب مصريين، فكروا في خدمة بسيطة كلنا بنحتاجها وبنعملها يوميًا، ودايمًا بنسأل عنها كل يوم الصبح بسؤال حافظينه كلنا: “هنفطر إيه النهارده؟”.

أيوه زي ما قرأتم كده بالضبط، الخدمة اللي بيقدمها “مصطفى أمين” و”عبد الله نوفل” و”محمد حبيب” هي خدمة توصيل المنتجات الطازة والمخبوزات كل يوم الصبح لحد باب البيت.. الحكاية بدأت في 2017 لما قرر الشباب الثلاثة إنهم يعملوا تطبيق صغير وسموه “بريدفاست – Breadfast” وكان هدفه الأساسي هو توصيل المخبوزات زي الكرواسون والباتيه والمفن والدانش والعيش والتوست وغيرها من المخبوزات، وبعدين اتطور الموضوع وبقوا بيقدموا شوية حاجات إضافية جنب المخبوزات، علشان يبقى فطار متكامل، زي اللبن، والزبادي، والجبنة، والمربى، والبيض، والسيريالز، ومنتجات تانية كتير.

لحد هنا والكلام عادي، والقصة لطيفة.. لكن الملهم واللي يستحق الإعجاب والتشجيع هو إن تطبيق “بريدفاست” استقبل مؤخرًا استثمار قيمته أكتر من مليون دولار، وده علشان يبدأوا تنفيذ خطة توسع هتشمل المنطقة العربية كلها، مش بس مصر.

الاستثمار ده جاي من أكتر من جهة، لكن أهم جهة فيهم هي إمبراطورية تمويل المشاريع الناشئة  Y Combinator اللي صاحبها رائد الأعمال العملاق Paul Graham وبكده يبقى “بريد فاست” أول تمويل لـ Paul Graham في “ستارت أب” مصري.

طبعًا الناس اللي عجبتهم الفكرة أكيد بيسألوا طب نعمل إيه لو عايزين نطلب فطارنا من “بريدفاست”.. مبدئيًا الأبلكيشن أو التطبيق بيقدم خدمة تجريبية في القاهرة الجديدة (التجمع) والرحاب والشروق والعبور ووسط البلد وحدائق الأهرام و6 أكتوبر والشيخ زايد، ومناطق كتير في القاهرة، وعلى وعد إن التطوير الجاي واللي هيكون قريب هيشمل مناطق أكتر.

في حالة إنك هتطلب فطار، هتحدد أنت محتاج إيه بالضبط، ومعاك لحد الساعة 10 بالليل لإرسال الأوردر، وبعد كده بيوصلك لحد باب البيت تاني يوم الصبح في الفترة من 5 الفجر لحد 12 الظهر، سعر التوصيل بيبقى 10 جنيه لو قررت تختار ساعة محددة، ومجانًا في الفترة ما بين 8 الصبح لـ 12 الظهر لو محددتش ساعة معينة.

ممكن تعرفوا آخر العروض وأهم الأخبار عن “Breadfast” من صفحتهم الرسمية على الفيسبوك من هنا.

وممكن تطلبوا من خلال موقع “Breadfast” من هنا.

أو من خلال التطبيق الخاص بيهم على Google Play لمستخدمي الـ Android  من هنا.

أو من خلال الـ App Store لمستخدمي الـ iphone  من هنا.