The Definitive Guide to Living in the Capital , Cairo , Egypt

رنا شرف

في الفترة الأخيرة، بدأنا نشوف اهتمام كبير بالحضارة المصرية القديمة، من خلال مشاريع شبابية جديدة في مصر بتستلهم تصميماتها من حضارتنا العظيمة، وده على قد ما بيوضح أننا كمصريين عندنا حب لهويتنا المصرية، لكنه بيثبت كمان أن المصريين القدماء لسة لحد النهارده قادرين يلهمونا بفنهم وإبداعهم اللي كان سابق عصرهم.

تعالوا نتعرف على أفضل منتجات محلية في السوق، مصنوعة بروح وشكل الحضارة المصرية القديمة.

“كمت ألكس – kmt Alx”

مشروع فني متخصص في بيع وطبع التيشيرتات والماجات والكابات بالروح المصرية القديمة، وكل التصميمات اللي بيقدمها كلها بتكون من الحضارة المصرية القديمة، زي مفتاح الحياة.

التصميمات فعلًا جميلة، وأسعارهم حلوة، يعني الكاب عندهم بحوالي 60 جنيه، والماج 50 جنيه، والتيشيرتات بيبدأ سعرها من 110 جنيه.

المكان بدأ أونلاين، وبسبب نجاحه أصبح لأصحابه محل صغير خاص في محافظة الإسكندرية، لكن لو أنت من القاهرة تقدر تطلب أي منتج منهم أونلاين ويوصلك لحد باب البيت.

علشان تعرفوا أكتر عن المشروع اضغطوا هنا.

“آرتكس بلانيت”

مشروع فني متخصص في بيع ملابس بتصميمات مصرية قديمة، وكنا بالفعل أتكلمنا عنهم بتفاصيل أكتر في المقال ده.

المشروع بيقدم ملابس شبابية زي سويت شيرت وتريننج وأكتر، وكلها عليها تصميمات من قلب حضارتنا القديمة.

التيشرتات عندهم سعرها بيبدأ من 225 جنيه، والبنطلون بيبدأ من 240 جنيه، والتريننج بيبدأ من 440 جنيه.

أشكال الملابس مميزة جدًا ومصرية بجد، منها اللي عليه مفتاح الحياة أو عين حورس أو أنوبيس وأكتر.. والمنتجات كلها نقدر نقول إنها بتحافظ علي الهوية المصرية بنسبة 100%.

“Sia Games”

المنتج ده هيعجب كل الناس اللي بتحب الألعاب والتسالي، أو اللي زهقت من ألعاب الموبيلات ونفسها تجرب حاجة جديدة، المنتج خاص بلعبة كان بيلعبها قدماء المصريين، وهي أقرب للعبة الشطرنج، ويقال إنها كانت اللعبة المفضلة لتوت عنخ أمون وللمصريين القدماء زمان.

اللعبة عبارة عن لوح خشبي عليه رموز مصرية قديمة ولونها أبيض وأسود زي لعبة الشطرنج، والهدف منها أنك تعدي الخمس قطع بتوعك من الخانة الأولى في البورد للخانة الأخيرة.

اللعبة دي موجود منها نموذج في المتحف المصري.

سعر اللعبة 180 جنيه، وعندهم برضه ألعاب تانية كلها من قلب الحضارة المصرية القديمة.

تقدروا تطلبوا اللعبة من هنا.