لعشاق المغامرات.. 3 نصائح لشراء كاميرا مناسبة للرحلات والسفر
أفضل كاميرات للسفر تصوير الرحلات سفر كاميرات نصائح لشراء كاميرا
Mohamed Talaat
سواء كان سفرك داخل محافظات مصر أو حتى خارج الحدود، لازم يكون معاك كاميرا مناسبة لالتقاط أجمل الصور، علشان توثق رحلتك طول العمر. تعالوا نتعرف على 3 نصائح عملية هتفيدك جدًا وأنت بتشتري كاميرا قبل رحلتك الجاية.
ابعد عن الكاميرات اللي معاها ملحقات كتيرة
لما هتروح محل علشان تشتري كاميرا حلوة، ممكن تلاقي البائع بيقنعك بكاميرا احترافية في بوكس ضخم فيه حامل ثلاثي وفلاتر ومجموعة عدسات إضافية وغيرها من الملحقات. لكن الحقيقة أنت مش محتاج كل ده، صحيح إن الملحقات دي ممكن تكون ضرورية لمحترفي التصوير، لكنها بالتأكيد مش مهمة لشخص بيحاول ياخد معاه في رحلته أقل مستلزمات.
علشان كده وأنت بتشتري كاميرا مناسبة للسفر اهتم أكتر باختيار كاميرا تناسب ميزانيتك وليها عدسة مدمجة ممتازة لالتقاط صور بجودة عالية.
اشتري كاميرا بـ واي فاي
بلاش تضيع وقتك أثناء السفر في نقل صور رحلتك من الكاميرا لتليفونك أو اللابتوب عبر أسلاك يو إس بي، وبدل الكلام ده اشتري كاميرا بتدعم خاصية الواي فاي والبلوتوث علشان تسهل عليك مشاركة الصور بمجرد التقاطها.
اشتري كاميرا سهلة التنقل ومتينة
تخيل إنك طالع رحلة لجبال سانت كاترين مثلًا، في اللحظة دي هتعرف إنك مش محتاج تشيل كاميرا ثقيلة، علشان كده اشتري كاميرا خفيفة الوزن يكون سهل عليك شيلها في أي مكان لالتقاط صور مميزة في أي وقت خلال الرحلة، حتى لو كنت على قمة جبل!
كمان مهم –ولنفس الأسباب اللي فاتت- تكون الكاميرا متينة وقادرة على تحمل أي ظروف قاسية خلال رحلتك، علشان كده ابعد خالص عن الكاميرات الهشة اللي ممكن تنكسر بسهولة.
بنتمنى لك رحلة سعيدة ترجع منها بأجمل الصور!
مقترح
الحياة في كايرو
تقرير.. مصر الثانية إفريقيًا من حيث عدد الأثرياء والقاهرة فيها 7200 مليونير
ترتيب مصر من حيث الأثرياء ثروات مصر +4
صحة ولياقة
