The Definitive Guide to Living in the Capital , Cairo , Egypt

كل سنة وكلنا بخير وصحة وسعادة، مافيش شك إن مصر من الدول القليلة في العالم اللي احتفالها بالمولد النبوي الشريف بيكون مختلف وبيتميز بالفرحة والبهجة، واحتفالنا دائمًا بيكون عنوانه هو شراء حلاوة المولد، لكن علشان تكون التجربة دي إيجابية، جهاز حماية المستهلك، أعلن عن مجموعة نصائح مهمة جدًا لكل كل شخص قرر يشتري حلاوة المولد من أسواق ومحلات مصر.

 أول نصيحة من جهاز حماية المستهلك للمصريين قبل شراء حلاوة المولد النبوي، هي ضرورة التأكد من تاريخ الإنتاج، وانتهاء الصلاحية، واسم المنتج، واسم المصنع المدون على المنتج.

كمان طالب الجهاز بضرورة اختيار المحلات والأماكن المرخص لها ببيع وتداول حلوى المولد الموثوق بها، ولازم تكون الأماكن دي بتتوافر فيها الشروط الصحية، ومطلوب منكم تتأكدوا من سلامة الحلوى قبل شرائها، وتتأكدوا كمان إنها طازجة وذات جودة جيدة.

وطبعًا بلاش تشتروا حلاوة المولد المكشوفة والمعرضة للأتربة والجراثيم.

وكنا نشرنا لكم في كايرو 360 مقال مهم عن أهم الأماكن اللي ممكن تشتروا منها حلاوة المولد في القاهرة، هتلاقوه في الرابط ده.

فيه نصيحة مهمة كمان، وهي عدم شراء الحلوى من المصانع غير المرخصة اللي مابتخضعش للرقابة الصناعية أو الصحية، حتى لو كان سعرها أرخص أو عاملة عروض مغرية.

وبعد شراء حلاوة المولد لازم تخزنوها في أماكن صحية جيدة التهوية، بعيدًا عن الحرارة والرطوبة والحشرات، وبصفة عامة يفضل تخزين حلاوة المولد عن طريق وضعها فى الثلاجة، للمحافظة على فترة صلاحيتها.