The Definitive Guide to Living in the Capital , Cairo , Egypt

عيد سعيد، وكل مخابز وحلوانية القاهرة بيغيروا الدفة من “حلويات رمضان” وداخلين بكل قوتهم على الكحك.

إحنا في كايرو 360 قررنا نوفر عليكوا التوهان واللف والدوران، وجمعنا هنا مجموعة من أحلى محلات الكحك وشوفنا عاملين إيه السنة دي وبكام.

كلمة أخيرة لازم نقولها عشان ضميرنا ينام مستريح، استمتعوا بالحلويات الجميلة، بس خليكوا فاكرين إن الصيف على الأبواب والبحر في انتظاركم.

عبد الرحيم قويدر

لو كان المطلوب حلويات رمضانية أو كحك العيد، عبد الرحيم قويدر ما يختلفش عليه اتنين. عبد الرحيم قويدر بيقدم حلوياتنا الكلاسيكية المحبوبة زي الكحك بأنواعه. يعني الكيلو السادة أو بالبلح أو بالملبن سعره: 90 جنيه. أما البيتي فور فمتوفر بنكهتين شوكولاتة وفانيليا. وسعر الكيلو لأيٍ منهم: 95 جنيه، وعندهم كمان غريبة بالفستق بنفس السعر.

شوفوا قائمة الأسعار الكاملة من هنا.

 

العبد

العبد من أحلى الأماكن اللي لازم تروحها لو المطلوب حلاوة المولد أو كحك العيد. وتشكيلة العبد في العيد السنة دي تشمل كحك سادة وبالملبن وعجمية، بسعر الكيلو: 85 جنيه. أما أسعار البيتي فور فبتكون بين 90 – 110 جنيه للكيلو، على حسب نوعه.

العبد كمان عامل مجموعة متنوعة من البسكويت (75 جنيه/للكيلو) منها بسكويت سادة وبالبرتقال والشوكولاتة وجوز الهند. أما الناس اللي عايزين كحك هدايا، العبد عامل علب مشكلة أسعارها تبدأمن 85 جنيه لعلبة كيلو، لغاية علبة أربعة كيلو سعرها 425  جنيه.

شوفوا قائمة الأسعار الكاملة من هنا.

 

ديوكس

هل خطر في بالك إن الحلوانية عندهم نوع جديد من الكحك السنة دي مخبيينه عننا؟ مستحيل ده يحصل، والدليل عند ديوكس. ديوكس عامل السنادي تشكيلة روعة من الكحك الملون بثلاثة نكهات: شوكولاتة وريد فيلفيت وفستق. ودول بيكونوا في علبة سعرها 140 جنيه. خلونا نبعد شوية عن تقاليع الكحك ونقول إن ديوكس عاملين علب كحك سادة (110 جنيه/للكيلو)، وعين جمل (180 جنيه/للكيلو)، وبسكويت سادة (85 جنيه) وغريبة (100 جنيه).

 

فور فات ليديز

في إشاعات منتشرة بتقول إن فور فات ليديز من أحسن المخابز اللي عملت ميني كحك سادة/عين جمل. بصراحة اللي إحنا عارفينه لحد دلوقتي عن مغامرة فور فات ليديز الجديدة، إن الكحك هيكون في علب صاج والكمية محدودة. تابعونا.

 

تسيباس

الخبرة لها عنوان، وهو “تسيباس”. تسيباس السنة دي عامل كحك سادة (96 جنيه/للكيلو)، وبالملبن (94 جنيه/للكيلو)، أما الكحك بالفستق فطبعًا أغلى شويتين (230 جنيه/للكيلو). أما بالنسبة لكيلو الغريبة السادة فسعرها: 94 جنيه، وكيلو بسكويت سادة: 70 جنيه. ونكهات البسكويت التانية زي البرتقال والشوكولاتة وجوز الهند فسعر الكيلو: 76 جنيه.

 

بسكو مصر

تفتكر جدتك عندها حاجة أغلى من علبة كحك بسكو مصر؟ يا ريت ننسى شوية النكت، وخلونا نقول إن أقدم مصنع حلويات مصري، غير من جلده السنة دي وبيقدم كحك ريد فيلفيت سعره: 100 جنيه وبس. بسكو مصر طبعًا عامل الحلويات التقليدية زي كحك سادة (85 جنيه)، وبعين الجمل (130 جنيه)، وعجمية/ملبن (90 جنيه).

بالنسبة للغريبة والبيتي فور، فسعرهم واحد وهو: 90 جنيه للكيلو. والبسكويت السادة والبرتقال سعرهم: 60 جنيه للكيلو. وبسكويت الشوفان سعره: 70 جنيه للكيلو. بسكو مصر كمان عندهم علب مشكلة، أسعارها تتراوح بين 125- 225 جنيه.

شوفوا قائمة الأسعار الكاملة من هنا.

 

توماس

ناس كتيرة بتحب توماس وحلوياته، وعشان كده توماس عامل تشكيلة كحك محصلتش. بتشمل كحك سادة (100 جنيه) وعين جمل (180 جنيه) وفستق (190 جنيه). وكمان كحك بالبلح وبالملبن (95 جنيه). توماس كمان عامل بيتي فور بالفانيليا والشوكولاتة (125 جنيه)، وبسكويت سادة (90 جنيه)، وبسكويت بنكهات مختلفة زي: البرتقال وجوز الهند والشوكولاتة والقرفة (110 جنيه).

شوفوا قائمة الأسعار الكاملة من هنا.

 

سينابون

صحيح سينابون لأول مرة يدخل الموسم الرمضاني، ومعاه رمضان ديلايتس بوكس. بس تعتبر تاني سنة يعمل فيها كحك العيد. سينابون السنة دي عامل أربعة أنواع من الكحك: سادة وعجمية وملبن (120 جنيه) وكحك بالعجمية والمكسرات (145 جنيه).

 

ساليه سوكريه

أكبر تشكيلة كحك شوفناها لغاية دلوقتي كانت عند ساليه سوكريه. اللي عامل كحك سادة وملبن وبلح وعجمية (120 جنيه/للكيلو)، وكحك بالملبن وعين الجمل أو بالعجمية وعين الجمل (150جنيه/للكيلو)، وأخيرا كحك بعين الجمل (180 جنيه/للكيلو). ساليه سوكريه كمان عامل علبة غريبة بالفستق 750 جرام (140 جنيه)، وبسكويت سادة (90 جنيه)، وبيتي فور (110-135) بنكهات مختلفة.

شوفوا قائمة الأسعار الكاملة من هنا.

 

تي بي إس

تي بي إس السنة دي عامل شغل حلو، وكمان بيقدم عرض لا يقاوم؛ اشتري كيلو كحك وهتاخد قسيمة شراء هدية على شكل كحكة بلاستيك. تشتري بها صنف أو أكتر من روائعهم. زي فنجان قهوة أو ساندويتش أو علبة دوناتس أو شوية براونيز.

أما الكحك فحدث ولا حرج، عندك كيلو الكحك السادة عامل:145 جنيه، والمكسرات عامل:180 جنيه، وفي علب اتنين كيلو فيها كحك وبسكويت وبيتي فور سعرها:290 جنيه.

كل سنة وانتوا طيبين.