The Definitive Guide to Living in the Capital , Cairo , Egypt

خلال حضور مؤتمر خاص أقامته شركة Asus مصر في القاهرة مؤخرًا، وأعلنت خلاله عن مجموعة جديدة من منتجاتها الجديدة في عالم الكمبيوتر الشخصي،  التقى فريق كايرو 360 بـ”جف لو”، الرئيس الإقليمي لمنطقة الشرق الأوسط وإفريقيا، واللي أكد لنا إن الشركة عندها طموح كبير لتوسيع استثماراتهم في مصر، اللي وصفها بأنها بوابة إفريقيا.

خلال السطور الجاية هنعرفكم على تفاصيل اللقاء مع “لو” واللي جاوب فيه على حاجات كتير.

في ظل الأزمات الاقتصادية العالمية، إزاي شركة Asus بتفكر في فتح أسواق جديدة وبتنزل منتجات جديدة رغم الركود العالمي؟

منتجات Asus معروف عنها القوة وأنها مميزة في التكنولوجيا الحديثة اللي طول الوقت بتطورها علشان تقدم لجمهورها تجربة استخدام مميزة، ومن أهم مميزات Asus أن السعر مناسب للمستخدم المصرى على الرغم من جودة الخامات والتكنولوجيا الحديثة والفريدة.

إيه هي أحدث تكنولوجيا وأجهزة طرحتها الشركة مؤخرًا داخل مصر؟

وفرت شركة Asus مجموعة من أجهزة اللاب توب المميزة واللي منها Vivobook Pro 16X OLED، واللي فيه كتير من المميزات اللي بيحتاجها المستخدم، إضافة لأحدث تكنولوجيا عرفها العالم، منها بشاشة 16 بوصة NanoEdge 4K OLED1، ومعالج AMD Ryzen 9 5900HX، وبطاقة NVIDIA GeForce RTX 3050 Ti، كمان بيتميز بأنه بيحتوي على تكنولوجيا DialPad الحصرية واللي بتدي تحكم دقيق وبديهي في الإبداع، والجهاز بيكون فيه مروحة مزدوجة بدون أي إزعاج.

وكمان تم طرح لاب توب Zenbook 17 Fold، واللي هيتصدر العالم بشاشة مميزة بتشتغل باللمس وهي بحجم 17.3 بوصة OLED FOLED وهي قابلة للطي وبتتضغط لحجم 12.5 بوصة، وده بيخليها أصغر من ورقة التصوير (A4) وده علشان يكون سهل في حمله، وكمان الشاشة بتعتمد على تقنية NanoEdge Dolby Vision، ودي بتيجي بإطار نحيف بدقة 2.5K  بألوان من PANTONE مع مستويات الضوء الأزرق المنخفضة المعتمدة من TÜV Rheinland.

وده بخلاف سلسلة ASUS Creator مع لوحة OLED زي ProArt Studiobook 16 OLED، و سلسلة حواسيب ROG، مع الجيل الثاني عشر من أحدث وحدات المُعالجة المركزية.

وإحنا بنوعد المستخدمين في السوق المصري خاصة والمنطقة العربية عامة، أننا هنستمر في توفير أفضل المنتجات وأكثرها إبداع واللي هتكون متوافقة مع متطلبات كافة المستخدمين وبتحقق معادلة مميزة بتضم الجودة والأداء والسعر.

فيه مخاوف دايمًا بخصوص الصيانة الخاصة باللابتوب خاصة أن الأسعار بقت عالية على قطاع كبير من المستخدمين، فإيه المميز في شركة Asus واللي يضمن للعميل أفضل خدمة ما بعد البيع؟

إحنا في Asus بنقدم ضمان سنتين مجانًا، (perfect warranty) ويقدر العميل من خلال الضمان مهما كان العطل أو المشكلة اللي تسبب فيها العميل (حتى لو كانت سوء استخدام من العميل زي حدوث كسور أو حروق) أنه يصلحها مجانًا، ولكن نفس العطل لابد أنه يكون مرة واحدة في السنة، يعني لو جهازك اتكسر فيه الشاشة يتم استبدالها مجانًا بدون مطالبة العميل بدفع أي مبلغ، في سنة الضمان الأولى هنصلحه أو نديك غيره، ولكن لو حصل ده تاني خلال نفس السنة فهو ملوش ضمان (القطعة اللى تم استبدالها مجانًا تخرج من الضمان المجاني ويظل باقي المكونات في الضمان)، ولو حصل السنة التانية نفس الكسر هنصلحه أو نستبدله بردوا بدون أي مقابل، والمميز أكتر أن الضمان بتاع Asus هيكون دولي، يعني لو أنت اشتريت جهاز من مصر ومسافر بره تقدر تزور أي وكيل وتسلمه الجهاز وهيتم إصلاحه بدون مقابل.

هل الشركة شاركت في البنية التحتية للعاصمة الإدارية الجديدة خاصة أنها بتحتاج لتكنولوجيا خاصة؟ّ

بشكل مباشر لم نشارك كشركة في البنية التحتية للعاصمة الإدارية، ولكن من خلال مجموعة من الوكلاء الخاصين بنا كان هناك اعتماد وتوريدات خاصة بشركة Asus سواء في الحكومة أو القطاع الخاص، وتم دعم شركائنا بطريقه مباشرة من Asus.

هل عندكم خطط مستقبلية قريبة أو بعيدة للاستثمار في المجال الصناعي داخل مصر؟

مصر هي بوابة إفريقيا ونتمنى يكون لنا مصنع في مصر نورد منه لإفريقيا، ولكن ده معتمد على التسهيلات الحكومية اللي ممكن تتقدم، خاصة أن فيه إجراءات صعبة جدًا، وأوراق كتير في أماكن كتير مرهقة، ولكن إحنا عندنا الاستعداد الكامل لو اتجاه الحكومة متوافق معانا أننا نقعد نتفاوض ومستعدين لدراسة الفكرة.

هل هيكون فيه مراكز بيع خاصة بـAsus كاستثمار منفرد؟

فيه خطة مستقبلية بتتمثل في سعينا لوجود 300 مركز بيع من خلال شركاء النجاح، وبالفعل بدأنا من خلال مجموعة محلات كبرى وشركات أننا ننطلق في السوق المصري، وهنستمر في زيادة حجم الاستثمارات في مصر.

إيه اللي أنتم محتاجينه من الحكومة المصرية لزيادة استثماراتكم في مصر؟

ماعندناش مطالب خاصة، وبالفعل عندنا خطة جيدة في حالة رغبة الحكومة المصرية في وجودنا بشكل أكبر بالسوق سواء عن طريق التصنيع علشان تكون مصر بوابة إفريقيا وتصدير منتجات Asus منها، أو من خلال شراكات لتوفير فرص عمل للشباب من خلال نقاط البيع، وتواصل الحكومة وتقديمها لتسهيلات للشركة زي الهند والبرازيل، هيساهم في زيادة تواجدنا، وإحنا مستعدين للجلوس مع الجهات المختصة للتفاوض والوصول لحلول ترضي جميع الأطراف.