The Definitive Guide to Living in the Capital , Cairo , Egypt

تسوق

مكاميك: شيالة صحية للبيبي والعيلة تقدر تشتريها من على الفيسبوك

مكاميك: شيالة صحية للبيبي والعيلة تقدر تشتريها من على الفيسبوك
بواسطة
Angie El Batrawy

ما نقدرش ننكر أن أمهاتنا زمان تعبوا كتير فى رعايتنا، إحنا بنعتبر نفسنا جيل محظوظ لأن فيه منتجات كتير ظهرت دلوقت بتسهل حياة الأم والطفل وبتوفر لهم الراحة والحماية، يعني مثلًا ظهرت موضة الـ Nursing Cover علشان تقدر الأمهات ترضع أولادها فى أي مكان براحتها، والبانيوهات اللى بستاند علشان ظهر الأم ما يوجعهاش من كتر الثني أثناء حموم البيبي.. إلخ من المنتجات اللى متوفرة فى كل مكان وبأسعار متفاوتة علشان تناسب ميزانية كل أسرة.

كنا كتبنا قبل كده موضوع شامل عن دليل كايرو 360 لشراء شيالات الأطفال فى القاهرة علشان نوضح الفرق ما بينهم، لكن المرة دي هنتكلم عن أفضلها صحيًا للطفل والأم وهي البيبي راب Baby Wrap اللى بدأوا فكرتها فى مصر منتج اسمه "مكاميك – Makameek".

البيبي راب Baby Wrap عبارة عن قطعة قماش مستطيلة بتتلف بطريقة معينة حول جسم الأم وبيتحط البيبي جواها، طبعًا القماشة لها معايير ومقاييس وخامات معينة وهي مناسبة من الشهر الأول لحد سنتين أو أكبر حسب الوزن (بتشيل لحد وزن 15 كيلو)، وممكن يستخدمها الأب أو الأم.

البيبي راب مصنوعة من القطن مع وجود نسبة من خامة الأسترتش (المطاط) وده بيخلي الطفل في وضع طبيعي من غير ما يكون فيه ضغط عليه، ده غير أنه بيخليه قريب جدًا من الأم كأنها محتضناه، وشكل الراب دي مش غريبة علينا لأنها شبه طريقة شيل الأمهات الأفارقة لأولادها وهما شغالين أو فى حياتهم اليومية، وبالتالي هي فكرة قديمة من زمان.

أصحاب مشروع مكاميك من مصر هما أيمن إيهاب (Co-Founder) وريم توفيق (Founder)، ريم خريجة فنون جميلة وهي صاحبة الفكرة، هي عندها هواية التفصيل وبتعمل حاجات Handmade، وأيمن مسئول عن جزء الـ Business، الفكرة جات لما ريم شافت الراب دي بره مصر فبدأت تستخدم كذا نوع قماش لحد ما لقيت نوع مريح بيتماشى مع معايير الراب اللى بره.  

وقال لنا أيمن: "الفكرة موجودة بره مصر ومن زمان لكن إحنا فكرنا أننا نقدمها كحل بديل للشيالات أو الـ Baby Wearing اللي موجودة فى السوق، فيه بعضها مستورد من بره لكن غالي، لكن إحنا بنقدمه بسعر أقل".

مكاميك مش هيقتصروا بس على البيبي راب، هما قالوا لنا أنهم شغالين دلوقت على منتجات تانية منها نوع تاني من الشيالات اسمه الـ Ring Sling عبارة عن قماش من نوع معين برضه مربوط بحلقة من خامة قوية علشان تقدر تشيل البيبي، وكمان هيعملوا Nursing Cover.

طب ليه البيبي راب تعتبر الأصح والأفضل عن غيرها من الشيالات؟

لأن الطفل فيها بيبقى قاعد وارتكاز جسمه بيكون على المقعدة بدل من عظم الفخذ وده بيحميه من تشوهات عظم الفخذ اللى ممكن تسببها الشيالات التانية واللى اسمها علميًا "Hip Dysplasia" أو ممكن يحصل كمان خلع في المفصل نفسه وده اسمه "Hip Dislocation"، كمان الشيالة بتوزع وزن الطفل على ظهر الأم/ الأب وبالتالي مش بتسبب ألم، وبتخلي أيدهم مش مشغولة ممكن يعملوا أي حاجة فى البيت أو بره بحرية.

 

إحنا جربنا بنفسنا طريقة لف شيالة مكاميك وكانت سهلة جدًا عكس ما توقعنا، كنا فاكرين أنها صعبة ومحتاجة تدريب كثير لكن ما أخدتش معانا أكتر من دقيقة، كمان طرق ربطها كتيرة جدًا بتتوقف على تطور نمو الطفل واحتياجات كل مرحلة سواء للأم أو الطفل (حديث الولادة، أو الأكبر من 3 شهور، 5 شهور، إلخ)، الخامة بتاعة القماش حلوة جدًا وبتيجي لك فى Package شيك عليها رسوم توضيحية لطرق لف القماش ومتاح منها 7 ألوان مختلفة.

 

طريقة ربط شيالة مكاميك ممكن تعرفوها من خلال الفيديو التوضيحي، وسعرها 250 جنيه ومصاريف الشحن 20 جنيه داخل القاهرة والجيزة، ممكن تلاقوها فى محلات الصياد فى مساكن شيراتون أو ممكن تطلبوها من خلال صفحتهم على الفيسبوك، وكمان لهم أكونت على أنستجرام.

مقترح