The Definitive Guide to Living in the Capital , Cairo , Egypt

الحلو من الأساسيات على كل سفرة في رمضان، ومهما كان النوع المفضل لينا في الحلويات ولكن إحنا دايمًا بنحب نجرب الجديد، علشان كده كل سنة بتطلع حاجات جديدة أو بيتجدد القديم وبيكون بشكل وطعم مختلفين. في السطور الجاية هنعرفكم على 7 حلويات جديدة ظهرت في 2023، اتفضلوا معانا.

سوشي

السنة دي ظهر سوشي تسيباس وهي عبارة عن علبة 15 قطعة سوشي بالنوتيلا واللوتس والفستق، وسعر العلبة 100 جنيه.

اللايصة

ظهرت تاني من جديد والمرة دي مكونة من بلح الشام بطعم المانجو والقشطة، وفستق وقشطة ومانجو، وسعرها 295 جنيه.

الهايصة

هي من الحاجات القديمة بردوا واتجددت والسنة دي في رمضان 2023 بقت تتكون من كروفل، كيك، لبن مكثف، كريمة، وقشطة، وسعرها 295 جنيه.

تري ليتشي فلامبيه

ميكس ما بين اللبن المكثف والفريش جوا كيكة فانيليا متزينة بالمارينج.

بنانا بلانك

والحلو ده شهرته “حبيبة” وهو عبارة عن كيكة جينواز بالسيمولينا، متغرقة في اللبن الطبيعي، ومعاها طبقتين من خلطة البنانا مع الكريمة الفريش بالمارينج والكراميل.

قطايف كورنيه

السنة دي ظهرت القطايف بشكل مختلف على هيئة “قمع آيس كريم” ونازلة بـ4 أطعمة “ريد فيلفيت – لوتس – مكسرات – أوريو”.

عثمانلية دويتو

الكنافة العثمانلية من أحلى الأكلات بعد الفطار، والسنة دي ظهر اختراع الدويتو بتاعها وبتبقى بطعمين مختلفين، محشية ومتغطية زي المانجا واللوتس، أو شيكولاته ومانجو.. إلخ.

الاختراعات في الحلويات كتير، وفيه منها اللي بينجح ويكمل معانا وفيه اللي بيتنسي بمجرد ظهوره، ولو تعرفوا حلويات جديدة ظهرت اكتبوا لنا في الكومنتات عنها.