The Definitive Guide to Living in the Capital , Cairo , Egypt

تسوق

منهم سوق ديانا والأزبكية.. رحلة لـ13 سوق تاريخي في القاهرة

أسواق القاهرة التاريخية أسواق في القاهرة حكايات أسواق القاهرة رحلة لأسواق القاهرة
منهم سوق ديانا والأزبكية.. رحلة لـ13 سوق تاريخي في القاهرة
بواسطة
Cairo 360

يمنى أحمد

السوق هو الحاجة الوحيدة اللي بنلاقي فيها احتياجاتنا، أوقات كتيرة بيقدر فعلًا يخلينا مبسوطين، خصوصًا لما نلاقي حاجات بقى لنا فترة بندور عليها. علشان كده إحنا في المقال ده هنعرفكم على أهم 13 سوق تاريخي في القاهرة. تابعوا معانا.

العتبة:

وهو أكتر سوق شعبي ومعروف في القاهرة، متخصص في بيع الأحذية والملابس وألعاب الأطفال وغيرها. وهو مش بس سوق رخيص هو كمان متوفر فيه حاجات كتيرة خلت الأثرياء يقصدوه في مطالبهم.

 

الموسكي:

وهو بيمتد من بعد سوق العتبة كده وأنت داخل على شارع الأزهر، وبيتوفر فيه كل حاجة، من الإبرة للصاروخ زي ما بيقولوا. متوفر فيه حقائب نسائية وماكياج والصاغات ومحلات الفضة والنجف ومحلات العصائر وغيرها.

 

الغورية:

وده موجود في شارع الأزهر، ومتوفر فيه كل أنواع الأقمشة والستائر والمفارش، وكمان بأسعار بسيطة وفيه جملة وقطاعي.

 

خان الخليلي:

وده بيكون فيه كل التحف والأنتيكات اللي ممكن تتخيلها، وقطع مصغرة مستنسخة من أجمل تماثيل مصر القديمة. الجو بتاع الشارع نفسه ممتع وبيدخلك في عالم مليان بهجة.

 

سوق ديانا:

وده أكبر سوق للأنتيكات في القاهرة، موجود جنب سينما ديانا في شارع عماد الدين بوسط البلد، وعلشان كده اتسمى باسمها، بيفتح كل يوم سبت من كل أسبوع، وبيضم كل الأنتيكات اللي ممكن تتخيلها واللي ماتتخيلهاش.

 

سوق النحاسين:

وهو سوق موجود في شارع المعز، مشهور بتصنيع الأواني النحاسية المصنعة على أيدي العمال في مهنة النحاس. هو صحيح السوق قرب يندثر بسبب قلة الإقبال عليه، لكن معروضاته جميلة ولسه فيه ناس بتيتخدمها.

 

سوق الحرفيين:

وده أكبر سوق متخصص في بيع قطع غيار العربيات، بعيد عن القاهرة بحوالي 40 كيلو، لكنه موجود فيه كل قطع الغيار حتى العربيات النادرة.

 

شارع عبد العزيز:

وده موجود قريب من العتبة في منطقة عابدين، فيه كل اللي تتخيله من الأجهزة الكهربائية والموبيلات وإكسسوراتها وغيرها، وهو مشهور بأسعاره الرخيصة.

 

سور الأزبكية:

وده موجود جنب مترو العتبة، فيه كل الكتب النادرة والمجلات القديمة اللي موجودة من قرن فات، ده المكان المفضل لعشاق الكتب وبيتميز بأسعاره الرخيصة وفيه كتب مستعملة.

 

المناصرة:

ودي منطقة مشهورة ببيع الموبيليا والأثاث المنزلي، موجودة جنب ميدان رمسيس، وأسعارها معقولة وفيها تشكيلة متنوعة وعلى قد الإيد.

 

الفجالة:

وده موجود برضه جنب رمسيس، كان مستور الأول ببيع المستلزمات والأدوات المكتبية، بس دلوقتي بقى فيه أدوات صحية وسيراميك، أسعاره معقولة ومعظم اللي فيه جملة.

 

سوق الإمام الشافعي:

وده بيكون موجود يوم الجمعة (علشان كدة اسمه سوق الجمعة) عند ضريح الإمام الشافعي بمنطقة القلعة، فيه شوارع كتير وحواري متفرقة، فيه بيتباع الكلاب والقطط والعصافير وأسعاره كويسة.

 

وكالة البلح:

وده موجود جنب منطقة الإسعاف، موجود فيه جميع الملابس الرخيصة، وفيه ماركات كمان، أصل الإسم بيعود إلى الزمن اللي كان مخصص لبيع البلح، بس حاليًا اتحول لسوق بيببع كل الملابس والأحذية والشنط.

مقترح