The Definitive Guide to Living in the Capital , Cairo , Egypt

بقلم: رنا شرف

الشتاء مرتبط بالأكل، حقيقة ما حدش بيختلف عليها، والمخبوزات لها نصيب كبير من اهتماماتنا في الشتاء، ورائحة المخبوزات في الشتاء لوحدها ممكن تخليك تدخل أي مخبز وتشتري أي حاجة.

رائحة المخبوزات عاملة زي رائحة القهوة كده! ماحدش يقدر يقاومها.. علشان كده جبنا لكم أجمد 3 مخابز بيقدموا منتجات تستحق التجربة.. يلا نعرفهم سوا.

 

لطيف وسيلي.. نجم وسط البلد

العنوان: 8 شارع المهدي، بالقرب من البنك المركزي المصري، وسط البلد.

من أقدم وأشهر مخابز القاهرة، وبيعتبر من أول المخابز اللي  قدمت الخبز الإفرانجي أو الفينو لسكان القاهرة، أسعار الفينو في المكان معقولة مقارنة بالجودة. الفينو بجنيه وربع للقطعة.

كمان المكان بيقدم الخبز الإيطالي المشهور بـ الفوكاتشا، وده طعمه جميل جدًا، والطبق سعره 20 جنيه.

الحلو في المكان إنه لسة محافظ على جودته رغم السنين، ولسه له جمهوره، وننصحكم تجربوه.

     

أحلى باتيه في.. كريستال

العنوان: 5 شارع طلعت حرب، وسط البلد.

من أشهر مخابز القاهرة، وتحديدًا منطقة وسط البلد، كريستال مش بس مخبز، ده كمان بيعمل أم علي خطيرة ولازم تجربوها، الكيلو منها بـ 70 جنيه.

الباتيه في كريستال كمان تحفة، القطعة بـ 9 جنيه، المكان لسه محافظ على جودته، وبيعتبر من معالم وسط البلد وله جمهور كبير.

سميراميس.. بقسماط من الآخر

العنوان: 72 شارع القصر العيني، وسط القاهرة.

مخبز مشهور من زمان برضه، ومميز بحاجات كتير، منها إنه بيقدم أحلى بقسماط ممكن تاكله. كمان بيعمل كعك رهيب ومخدوم حلو.

المكان محافظ على مكانته، وده الجميل فيه، وناس كتير لسه بالنسبه لهم سميراميس هو مكانهم المفضل ومش بسهولة يغيروه.

الأسعار في المكان معقولة جدًا مقارنة بجودة المنتجات، على سبيل المثال كيلو الكعك السادة بـ 155 جنيه، وكيلو البسكويت بـ 120 جنيه.

 

اللي فات كان أشهر وأقدم المخابز في القاهرة، يلا قولوا لنا جربتوا إيه منهم، وإيه اللي بيعجبكم من منتجاتهم.