Mohamed Talaat
مين فينا مابيحبش الجلد الطبيعي، لكن ممكن بعضنا يكون مايعرفش الفرق بينه وبين الصناعي، أو نتلخبط بينهم، علشان كده هنقدم لكم 4 معلومات هيفيدوكم لما تيجيوا تشتروا شنطة أو جزمة أو حتى حزام.
1- الملمس والريحة
ملمس الجلد الطبيعي خشن وفيه التواءات كده، وبيكون متين أكتر من الصناعي اللي بيكون مرن وناعم وممكن يكون مطاط كمان، والريحة بتاعة الجلد الطبيعي مميزة ومحببة للكل.
مقاوم النار
لو شكيتم أنكم مش عارفين الجلد الطبيعي من الصناعي، المتعارف عليه أن الطبيعي مقاوم للنار، فممكن تجربوا بولاعة تولعوا فيه، فلو لقيتم ريحة زي البلاستيك يبقى ده صناعي علشان المواد البترولية اللي فيه، لكن لو طبيعي هيبقى ريحته زي الشعر المحروق.
العلامة التجارية
المنتجات اللي مصنوعة من الجلد الطبيعي بتكون فيها في بعض الأحيان علامة مميزة زي “Made with genuine leather”، ولكن الجلد الصناعي مش بيتكتب عليه حاجة.
السعر
الجلد الطبيعي بيكون غالي جدًا عن الصناعي وطريقة إعادة تشكيله ودبغه مختلفة تمامًا عن الصناعي ومكلفة، علشان كده أوعوا تسترخصوا في الجلد الطبيعي وحافظوا على إنكم تشتروا من محلات موثوق فيها.