The Definitive Guide to Living in the Capital , Cairo , Egypt

أحمد عز بيتسلل لمركب في عرض البحر ويشتبك مع مجموعة إرهابيين ويتوسل لست جميلة أنها تساعده علشان ينقذ إبنه اللي صدر ضده حكم بالإعدام! هي دي البداية اللي قرر المخرج أحمد خالد موسى والكاتبة مريم نعوم أنهم يصدمونا بيها من الحلقة الأولى لمسلسل أبو عمر المصري. وسابونا نحاول نلاقي إجابات منطقية ونرتب أحداث القصة لحد الحلقة الخامسة تقريبًا!

النوع ده من الرهانات على ذكاء المشاهد بيكون صعب. رهان عامل زي لعبة الروليت الروسي.. ياتعيش والمشاهد يعجبه المسلسل ويتابعه للنهاية، وإلا تموت والمسلسل يتنسى وينصرف عنه المشاهد علشان يتفرج على أعمال تانية مش بتتطلب منه أي قدر من تشغيل الدماغ. خاصة أن المشاهدين في شهر رمضان بيكونوا عاوزين (يسلوا صيامهم). لكن أبو عمر المصري قدر يكسب الرهان مع صناعه والجمهور على حد سواء.

أبو عمر المصري هو واحد من أسماء عديدة بيظهر بيها الفنان أحمد عز بطل المسلسل. ملامح شخصيته رسمها الكاتب المخضرم (عز الدين شكري فشير) اللي له كتابات سياسية كتير بيتطرق فيها لعالم جماعات التطرف الديني ومحاولات الشباب أنهم يحققوا أهدافهم وأحلامهم وسط مجتمع طاحن وظروف إنسانية واجتماعية لا ترحم.

 لكن الأسماء مش بتهم لما بنتابع رحلة المحامي الشاب حديث التخرج اللي عاوز يمارس مهنة المحاماة بشكل صحيح. لكنه بيصطدم بالطبقة الفاسدة في مصر في فترة التسعينيات. الفترة اللي انتهت بالزلزال الشهير اللي فتح أبواب الجحيم على الفاسدين من خلال محاولة أحمد عز التصدي لهم من خلال شغل المحاماة ثم بنكتشف أن…. نعتقد أن كفاية كده علشان نحمسكم تشاهدوا المسلسل بنفسكم وتتابعوا الأحداث اللي بتستمر داخل وخارج مصر.

من نقاط قوة المسلسل وضعفها في نفس الوقت هي الإطار الزمني اللي بتدور فيه. المسلسل بيدور في 3 محاور أساسية. محور الماضي اللي بنفهم من خلاله إيه اللي بيحصل دلوقتي. ومحور الحاضر اللي بنحاول نشوف من خلاله نتائج أفعال (أبو عمر) في الماضي، ومحور المستقبل اللي بنتابع من خلاله التطورات في الأحداث. التنقلات بين الثلاث محاور دي ممكن تكون مربكة شوية للمشاهدين، خاصة في شهر رمضان زي ما وضحنا. لكن من ناحية تانية كل فريق عمل المسلسل اشتغل بمنتهى الحماس علشان يخلي الانتقال بين الثلاث محاور سلس وسهل ومفهوم.

أحمد عز بيقدم أداء فني قوي ومميز، بنشوف تعبيرات جيدة على وجهه ومناسبة للمواقف اللي بيمر بيها، وقدر يظهر كشخص عادي له انتصارات وانكسارات وأخطاء، على العكس من بعض الشخصيات اللي عملها في الماضي واللي كانت دايمًا بتظهر في مظهر الشخص الملاك أو البطل اللي مش بيعمل أي أخطاء.

أروى جودة في دور شيرين هي كمان بتقدم أداء كويس. حسينا ببعض التكرار في نمط أدائها في الحلقات الأولى من المسلسل، لكن بعد كدة الشخية بتتطور وبنحس بجديد في الأداء.

المغربية الجميلة نادية كوندة هي مفاجأة السنة دي بالنسبة لنا! نادية في دور كنزة عاملة معادلة بين جمال الشكل الهادئ مع التمثيل الغير منفعل مع دراسة واعية لشخصيتها في المسلسل وقدرة على استغلال السيناريو والقصة لصالحها إلى أقصى درجة. ونعتقد أن الدور ده هيكون نقطة انطلاق كبيرة لها في السينما والدراما المصرية. وافتكروا كلامنا ده!

فتحي عبد الوهاب اللي بيقدم واحد من أقوى أدواره على مستوى تاريخه الفني. لكن للأسف حسينا ببعض المبالغة في الأداء. يعني الشخصيات دي مش بنشوفها في الحقيقة ومش بتتكلم أو بتضحك كده في الحقيقة. أداء غير واقعي لكنه أداء مسرحي مميز بنرفع علشانه القبعة لفتحي عبد الوهاب اللي بيقدر يكون شيطان تمثيل أو ملاك حسب رغبته وإرادته الشخصية!

وأخيرًا محمد جمعة.. الشاب اللي كل جزء من ملامحه مصري جدا، واللي قدر يقدم في رمضان السنة دي بشكل عام أكتر من دور مميز على الرغم من اختلافهم عن بعض. محمد هيكون له مستقبل رائع وبرضه افتكروا كلامنا ده.

أبو عمر المصري من أكثر مسلسلات رمضان 2018 المتعوب عليها واللي صناعها حبوا يبذلوا قصارى جهدهم علشان يطلعوا لنا عمل قوي ومميز. وأكيد هيلاقوا نتيجة مجهودهم في تقييمات الجمهور واقباله على المتابعة.