The Definitive Guide to Living in the Capital , Cairo , Egypt

لو عاوزين تعرفوا مين هما أحلى النجوم وكمان أخبارهم
الفنية وحياتهم الشخصية أكيد كل ده هـ نلاقيه في برنامج “أحلى النجوم”
اللي بـ ييجي على قناة النهار الفضائية وبـ تقدمه المذيعة بوسي شلبي، البرنامج ده
بـ يهتم باختيار أفضل النجوم المحبوبين وكمان بـ نتعرف من خلاله على مشوار حياتهم
الفني والشخصي، وكمان بـ نعرف صفات جديدة في كل ضيف بـ يظهر في البرنامج زي مثلاً
حبه لأسرته أو الأطفال وغيرها من الصفات.

من الجميل في البرنامج أنه بـ يختار فنانين مميزين
ومحبوبين للجمهور زي مثلاً هالة صدقي، عمر الشريف، وهند صبري وغيرهم كثير.

الجميل فيه كمان أنه بـ يجذب انتباه المشاهد، ونلاحظ أن في
كل حلقة فيلم تسجيلي قصير عن الضيف وبـ يعرض فيه مشوار حياته الفني وكمان الفواصل
دائمًا بـ تكون خاصة بالضيف، وأماكن التصوير جميلة جدًا لأنها بـ تكون فى أماكن
مفتوحة وده بـ يخلى البرنامج مميز عن باقى البرامج الثانية وبـ تكون مريحة لعين
المشاهد.

أداء بوسي شلبي في البرنامج مميز جدًا فيه تناغم واضح بينها
وبين وضيوفها، كمان الحوار بـ يكون في إطار شد وجذب وفعلاً شيق وممتع، فهي بـ تهتم
بسؤال الضيف عن القديم والجديد في حياته الفنية أو الشخصية لأنها ملمة به جيدًا وده
بـ يرجع لأنها بـ تغطى الكثير من المهرجانات العالمية وصلتها قوية بالفنانين.

من الملفت للانتباه أن في كل حلقة من البرنامج بـ تهتم بوسي
بمعرفة رأي الضيف في الثورة، ومنهم اللي كان حيادي ومنهم اللي مع الثورة، ففي حلقة
عمر الشريف اهتمت بمعرفة حياته بداية من نشأته في الإسكندرية وعلاقته بالرؤساء
خاصة وأنه كان له دور قوي مع الرئيس الراحل أنور السادات لما طلب منه أنه يتصل برئيس
وزراء إسرائيل لإبلاغه بقدوم السادات وإزاي هـ يتم استقباله هناك وكمان الفنان عمر
الشريف كان موقفه واضح من الثورة المصرية من البداية فهو مع الشعب ومؤيد لهم وكمان
اتكلم عن حياته الشخصية وعلاقته بالفنانة فاتن حمامة وأحفاده وابنه الوحيد بينما
في حلقة هند صبري اهتمت بمعرفة أخبارها الشخصية وموقفها من الثورة التونسية وخاصة
أنها كانت حامل في الفترة دي.

ورغم جمال البرنامج إلا أنه ينقصه معرفة رد فعل المشاهد
تجاه الحلقة فمافيش مشاركات فعلية سواء عن طريق الإيميلات أو صفحة على الفيس بوك
له.